बाँके असोज २९ गते ।
भारतको रुपैडिया भएर जमुनाह नाका हुँदै सुर्खेत पुर्याइएको एक लाख ५२ हजार बराबरको अवैध चिनी सुर्खेत प्रहरीले गएको असोज २८ गते बरामद ग¥यो । यो त एउटा प्रतिनिधिमुलक घटना हो ।
जमुनाह नाका भएर भित्रिएका अवैध सामान प्रहरीले कहिले नेपालगन्ज त कहिले अन्य जिल्लामा पुगेपछि बरामद गर्ने गरेको छ । अवैध तस्करी र चोरीपैठारी नियन्त्रण गर्ने जिम्मेवारी सशस्त्र प्रहरीको हो । त्यही भएर जमुनाह नाकामा सशस्त्रको विओपी पोष्ट पनि छ । जमुनाह नाकामा तीन ठाउँमा सशस्त्र प्रहरीले चेकजाँच गर्छ ।
तर सशस्त्रले सेटिङ मिलाएर ठूलठूला अवैधका सामानहरु नेपाल भित्रिरहेका छन् । त्यति ठूलो परिमाणमा चिनी भित्रिदा पनि सशस्त्र प्रहरीले सुइको पाउन नसक्नु सेटिङको विकल्प नभएको स्थानीयबासी बताउँछन् । सर्वसाधरणले पाँच केजी चिनी ल्याउँदा भन्सार गराउन दवाव दिने सशस्त्र प्रहरीले सेटिङमा क्विन्टलका क्विन्टल चिनी तस्करी गराउँदै आएपछि सशस्त्रको चर्को आलोचना भएको छ ।
दैनिक उपभोग्य तथा प्रयोगका लागि सर्वसाधरणले एक दुई जोर कपडा र एक बोरा चामल लिन खोज्दा सशस्त्र प्रहरीले धरपकड गर्ने गरेको छ । अनाहकमा सर्वसाधरणलाई दुख दिने गरेको छ । सेटिङ मिलाउन नसक्ने सर्वसाधरणले सामान्य समान लिन खोज्दा पनि रोक्ने गरेको प्रत्यक्षदर्शी बताउँछन् । जमुनाह नाकामा खटिने सशस्त्र प्रहरीले १० रुपैयाँसम्म पनि अशुल्ने गरेको सर्वसाधरणको भनाइ छ ।
मुख्य नाकामा कडाइ गरेको जस्तो देखाएर गरिव र विपन्न नागरिकहरुलाई दुख दिने सशस्त्र प्रहरीले अन्य नाकाहरुबाट भने सेटिङमा अवैध सामाग्री भित्र्याउने गरेको स्रोत बताउँछ । सीमा नाकाहरुबाट अवैध तस्करी र अवैध कारोबार नियन्त्रणका लागि खटिएको सशस्त्र प्रहरी बलको बिओपीका कर्मचारीहरुले तस्कर र अवैध कारोबारीहरुसँग पछिलो समय मिलेमतो गरी सेटिङमा तस्करीका सामान ओसार पसारको मार्ग खुल्ला गर्ने गरेको स्रोतको भनाई छ ।
सशस्त्र प्रहरी बल नम्बर ३० गण बागेश्वरी बाँकेका एसपी रमेश बिक्रम शाहीले नियम विपरीत आफैले घुमुवा राखेका छन् । एसपी शाहीले घुमुवा खटाएर नै असुली गर्दै आएको स्रोत बताउँछ । शाहीले १२ जना घुमुवा परिचालन गरेको प्रत्यक्षदर्शीहरु बताउँछन् । एसपीले खटाएका घुमुवाले सेटिङ मिलेका अवैध सामानहरु आफैले स्कटिङ गरेर सीमा पार गराउने गरेको स्रोत बताउँछ ।
अनलाइन खोजखवरलाई प्राप्त भिडियोहरुमा साइकल, मोटरसाइकल र गाडीमा समेत अवैध सामानहरु स्कटिङ गरेर सीमा पार गराइएको देखिएको छ । एसपी शाहीले तस्करी गराउनकै लागि असई सोम राज शर्मा र सहायक हवल्दार सन्तोष सुनारलाई घुमुवा खटाएका छन् । सशस्त्र प्रहरीमा गोप्य सूचना संकलनका नाममा घुमुवा राख्न नपाइने नियम तोडेर एसपी शाहीले आफू निकटका तस्करहरुसँग रकम उठाउन सक्ने व्यक्तिलाई घुमुवाको रुपमा परिचालन गरेका छन् ।
नीति विपरीत काम गर्ने सशस्त्रलाई कारवाहीको दायरामा ल्याउनु पर्ने हो । तर उनीहरुलाई कारवाहीबाट जोगाउन एसपीले दुई चार दिन अगावै बिरामी विदा दिएर घरमा पठाउने गरेका छन् । जस्का कारण उनीहरुको मनोबल झन बढेको सशस्त्र प्रहरीकै अधिकारीहरु बताउँछन् ।
ति अधिकारीले भने–‘कारवाही गरे आफ्नो असुली धन्दामा झट्का लाग्ने र पोल खुल्ने डरले हाकीमले उनीहरुलाई संरक्षण गर्नुहुन्छ ।’ एकजना तस्करले महिनामा दुई लाखसम्म सशस्त्रलाई लाइन दिने गरेका छन् । ‘एसपी सापलाई लाइन नदिए सामान सीमा पार गराउन सकिदैन एकजना तस्करले अनलाइन खोजखवरलाई भने–‘महिनाको दुई लाखदेखि माथि सशस्त्रका घुमुवालाई बुझाउनु पर्छ ।’ करिव ६६ किलोमिटर खुल्ला सीमा रहेको बाँकेमा असई शर्मा र सहायक हवल्दार सुनारको हिंजोआज राज चलेको छ । उनीहरुले नै असुलीको रकम उठाएर एसपीसम्म पुर्याउने गरेका छन् ।
विओपीका अधिकांश पोष्ट इन्चार्जहरुले असुली धन्दाका लागि लाइन मिलाएका छन् । नेपाल–भारत सीमा अन्तरगत बाँकेको खडैचा, हिरमिनिया, भज्जुपुरुवा, नयाँ वस्ती, जमुनाह, जयसपुर, पचपोखरा, साइगाउँ, बढैया, सैनिकलगायतका सहायक नाका चोरी तस्करीका लागि प्रमुख सहायक नाका हुन् । नाकाबाट हुने अवैध ओसारपसार नियन्त्रण गर्ने जिम्मा राज्यले सशस्त्र प्रहरीलाई दिएको छ । राज्यले दिएको जिम्मेवारी अनुसार सशस्त्र प्रहरीले भूमिका निर्वाह गर्नुपर्ने हुन्छ । तर अवैध ओसारपसार गर्ने सशस्त्र प्रहरी नै असुली धन्दामा लागेपछि नाकाबाट अवैध ओसारपसार मौलाउँदै गएको छ ।
Discussion about this post