बाँके पुस ७ गते ।
बैंकको चर्को ब्याजदर नघटाए सरकार ढाल्ने चेतावनी बाँके र बर्दियाका ब्यापारीले दिएका छन् । बैंकले बढाएको ब्याजको विरोधमा आन्दोलन गर्ने केहिदिन अघिको घोषणा अनुसार यहाँका ब्यापारीले शनिवार नेपालगन्जमा विरोध सभा गरेर बैंकले बढाएको ब्याज तत्काल फिर्ता नलिए सशक्त आन्दोलनमा उत्रिने चेतावनी दिए ।
नेपालगन्ज उद्योग बाणिज्य संघको अगुवाईमा भएको विरोध सभामा बर्दिया र सुर्खेतका उद्योगी, ब्यवसायीले समेत ऐक्यवद्धता जनाउँदै बैंकले बढाएको ब्याज तत्काल फिर्ता नलिए सरकारलाई असहयोग गर्ने स्पष्ट पारे ।
धम्बोझी चोकमा भएको विरोध सभामा सुर्खेत उद्योग बाणिज्य संघका अध्यक्ष लक्ष्मण कँडेल रावतले उद्योगी, ब्यवसायीसँग सरकार ढाल्ने ताकत भएको बताउँदै समयमै समस्या समाधान नगरे सरकारलाई समस्या हुने धारणा राखे । ‘हामीसँग सरकार बनाउने र ढाल्ने शक्ति छ । सरकारले बेलैमा ब्याजदर नघटाए आन्दोलनको आँधिबेहरी मार्फत सरकार ढाल्ने छौँ,’ उनले भने ।
उनले नेपालगन्ज उद्योग बाणिज्य संघका अध्यक्ष टंकबहादुर धामीले जुन ब्याजदरमा ऋण लिएको हो सोही दरमा ब्याज कायम गर्नुपर्ने बताए । उनले उद्योगी ब्यवसायीले ऋण मिन्हा गर्न माग गरेको नभई पहिलेकै दरमा ब्याज लिन माग गरेको जिकिर गरे । ‘पहिले ८ प्रतिशत ब्याज लिने गरि ऋण दिएका बैंकले बढाएर १६ प्रतिशत पुर्याउँदा धेरै उद्योगी, ब्यवसायीले ऋण तिर्न नसकेर बन्द भएका छन्,’ उनले भने, ‘बैंकको ब्याज तिर्न नसकेर कतिपयले हात्महत्या गर्न परेको छ । ब्याज नघटाए नेपालगन्जबाट सुरु भएको आन्दोलनलाई देश ब्यापी बनाएर सरकारलाई अप्ठ्यारो बनाउँछौँ ।’
मधुवन उद्योग बाणिज्य संघका अध्यक्ष दुर्गा रिमालले बैंकले ब्याजदर बढाउँदा उद्योग, ब्यापार धरासायी भएको बताउँदै सरकारले यस विषयमा नसोँचे अझ भयावह अवस्था आउने जिकिर गरे । उनले बैंकको ब्याजदर समायोजन गर्न सरकारले बेलैमा ध्यान नदिए राज्यमा आर्थिक संकट आउने दावी गरे । उनले भने, ‘बैंकको ब्याज तिर्न नसक्दा धेरै उद्योगी, ब्यापारीले पसल र उद्योगमा ताला लगाउनु परेको छ । सरकारले बेलैमा नसोँचे अझैँ भयावह अवस्था आउने छ र यसबाट सरकारलाई ठूलो नोक्सान हुने छ ।’
विरोध सभामा कोहलपुर उद्योग बाणिज्य संघका महासचिव मात्रिका सापकोटाले कोरोनाको बेला ब्यापार, ब्यवसाय बन्द गर्न लगाएको सरकारले ऋणको ब्याजदर बढाएर ब्यापारीको घाउमा नुन, चुक लगाएर झनै घाइते बनाएको बताए । उनले सुरुमा जुन ब्याजदरमा ऋण दिएको हो सोही दरमा ब्याज कायम गर्नुपर्ने बताए । ‘हाम्रो यो सिनेमको टेलर मात्र हो । पूरै सिनेमा बाहिर आए उद्योगी, ब्यवसायीको तुफाने सरकार छिनभरमै ढल्ने छ,’ उनले भने, ‘उद्योगी, ब्यवासीको आँधिबेहरी आए सरकारलाई बचाउन कोहि बाहिर आउने आँट गर्ने छैन । बचाउन हार गुहार गरे पनि कसैले साथ दिने छैन ।’
नेपाल उद्योग बाणिज्य महासंघका केन्द्रिय सदस्य अब्दुल वाहिद मन्सुरीले बैंकको ब्याजले उद्योगी, ब्यवसायीहरु आत्महत्या गर्ने अवस्थामा पुग्दासमेत सरकार मुकदर्शक भएर बस्नु दुर्भाग्य भएको धारणा राखे । उनले ब्यापारीहरुले दिएको चन्दाले राजनीतिक दलहरु चलेको बताउँदै सरकारले बेलैमा ब्याजदर नघटाए आन्दोलनको आँधिबेहरीले सरकारलाई बढार्ने दावी गरे । उनले भने, ‘उद्योगी, ब्यापारीको आन्दोलनलाई कम नआक्ने मेरो आग्रह छ । ब्यापारी, उद्योगीको करले देश र राजनीतिक दल चलेका छन् । समयमै ब्याजदर समायोजन नभए सरकारलाई बढार्ने आँधिबेहरी सिजर्ना गर्छौँ ।’
बर्दियाका उद्योगी, ब्यवसायीको समेत सहभागिता रहेको विरोध सभामा ब्यवसायिक सरोकार मंच बाँके अध्यक्ष देवानन्द अर्यालले पनि ब्याजदर समायोजन नभए सरकारलाई असहयोग गर्ने र सरकार गिराउने आन्दोलन गर्ने चेतावनी दिए ।
Discussion about this post