बाँके माघ १८ गते ।
भारतको लखनऊ निवासी शिवकुमार बर्मा गत साता घुमफिरका लागि नेपालगन्ज आए । नेपालगन्ज आउने क्रममा उनी चढेको भारतीय नम्बर प्लेटको गाडी पाँच ठाउँमा जाँच गरियो । नेपाल–भारत सीमानाका जमुनाहदेखि ट्राफिक चोकसम्म झण्डै तीन किलोमिटरको दूरीमा पाँच ठाउँमा जाँच गराउँदा उनी हैरान भए । लामो यात्राले थाकेका उनी सुरक्षाकर्मीको ब्यहारले झनै आजित भए । त्यसपछि उनी नेपालगन्ज नआउने निधोमा पुगे ।
नेपालगन्ज भारतीयले चलेको सहर हो । यहाँ किनमेलका लागि मात्र नभई वागेश्वरी मन्दिर, हडिया बाबा मन्दिर, जामा मस्जिदको दर्शनका लागि पनि भारतीय नेपालगन्ज आउँछन् । किनमेल गर्न, क्यासिनो खेल्न, रमाइलो गर्न, होटल र रेष्टुरेन्टमा खाना खाने उद्देश्यले पनि भारतीय नेपालगन्ज आउने गरेका छन् । कतिपय इष्टमित्र, चेलिबेटी भेट्घाट गर्नका लागि आउँछन् ।
भारतीय नेपालगन्ज आउँदा यहाँको होटल, रेष्टुरेन्ट, पान पसलदेखि रिक्सा चालकले समेत काम पाउँदा आर्थिक गतिविधि चलायमान हुन्छ, तर यी भारतीय पाहुनालाई नाकामा रहेका सुरक्षाकर्मीले सास्ती दिँदा नेपालगन्ज आउनेको संख्या घट्दै गएको छ ।
तीन किलोमिटरको दूरीमा पाँच ठाउँमा जाँच गराउन परेकै कारण भारतीयहरु नेपालगन्ज आउन छाड्दै गएको नानपाराका सलाउद्दिन जसगढले बताए । उनले एक पटक आउँदा पाँच ठाउँमा जाँच गराउन पर्दा वाक्क लागेर आएको बताए । उनले, ‘एक ठाउँमा जाँच गरेपछि अन्यत्र कुनै रोकतोक नहुने ब्यवस्था मिलाएको भए भारतीयलाई आउन सजिलो हुन्थ्यो र यहाँ घुम्न धेरै भारतीय आउँथे पनि ।’
उनले सुरुमा जमुनाहमा खटिएका सुरक्षाकर्मीले जाँच गरेको बताए । त्यसपछि भन्सार, जयसपुर, चौलिक्का र त्यसपछि ट्राफिक प्रहरी पोष्टले जाँच गरेको उनले सुनाए । उनले धेरै ठाउँमा जेकजाँच काम नरोकिए भारतीय आउने क्रम अझैँ रोकिने स्पष्ट पारे ।
Discussion about this post