बाँके फागुन २८ गते ।
बाँके प्रहरीले स्रोत नखुलेको एक करोड बढि रुपैयाँ नेपालगन्जका दुई होटलबाट बरामद गरेको छ । गोप्य सुचनाको आधारमा जिल्ला प्रहरी कार्यालय बाँकेबाट खटिएको प्रहरीले नेपालगन्जका दुई होटलमा छापा हानेर स्रोत नखुलेको एक करोड १५ लाख रुपैयाँ बरामद गरेको जनाएको छ ।
बाँके प्रहरीले हुण्डी कारोबारमा संलग्न तीन जनालाई आइतबार पक्राउ गरेको थियो । पक्राउ परेकाहरुको बयानका आधारमा होटलमा छापा मार्दा स्रोत नखुलेको रकम फेला परेको बाँकेका प्रमुख प्रहरी उपरीक्षक सुभाषचन्द्र बोहराले जानकारी दिए ।
उनका अनुसार नेपालगन्ज उपमहानगरपालिका ४ बसपार्कस्थित होटेल सन्तोष दंगालीमा बसेका ३५ वर्षीय रोहित क्षेत्री, दाङका ४३ वर्षीय कृष्ण विक र भारतीय नागरिक राहुल जैसवाल पक्राउ परेका छन् । त्यसैगरी, बसपार्ककै अर्को कालिका होटेलमा छापा मार्दा नेपालगन्ज उपमहानगरपालिका १६, जयसपुरका ५० वर्षीय सलिम जोलाह र सोही स्थानकै २५ वर्षीय आसिफ अन्सारीलाई स्रोत नखुलेको रकमसहित नियन्त्रणमा लिएको उनले जानकारी दिए ।
बाँके प्रहरीले आइतबार स्रोत नखुलेको ३८ लाख रुपैयाँसहित हुण्डी कारोबार गर्ने गिरोहका तीन जनालाई पक्राउ गरेको थियो । नेपालगन्जको धम्बोझी चोकस्थित सांग्रीला बैंक नजिकबाट स्रोत नखुलेको ३८ लाख रुपैयाँसहित राजापुर नगरपालिका १, बर्दियाका २० वर्षीय अनुप थारु, बर्दियाकै पूर्णिमा थारु र नेपालगन्ज उपमहानगरपालिका १६ जयसपुरका हसिब अजमत जसगढलाई पक्राउ गरेको प्रहरीले जनाएको छ ।
Discussion about this post