बाँके साउन ३० गते ।
बाँके प्रहरीले लागु औषधको जालो तोड्दै गएको छ । बाँके प्रहरी प्रमुख एसपी रामप्रसाद घर्ती मगरको कडा निर्देशनपछि मातहतका प्रहरी कार्यालयले लागु औषधसहित कारोवारी र ओसार पसारमा संलग्नलाई धमाधम पक्राउ गर्न थालेका छन् ।
अस्थायी प्रहरी पोष्ट नगर भवनमा कार्यरत सहायक प्रहरी निरीक्षक सुनिल शाहीको टोलीले दुई दिनमा एक सय ४७ ग्राम ९ सय मिलिग्राम ब्राउनसुगर बरामद गरेको छ । बुधवार दिउँसो ४७ ग्राम ब्राउनसुगर सहित एक जनालाई पक्राउ गरेका शाहीले शुक्रवार १०१ ग्राम ९ सय मिलिग्राम ब्राउनसुगर सहित एक जनालाई पक्राउ गरेको हो ।
विहीवार पक्राउ परेका ब्यक्तिले दिएको सूचनाको आधारमा प्रहरीले शुक्रवार भारी परिमाणको लागु औषध ब्राउनसुगर सहित एक जनालाई पक्राउ गरेको बाँके प्रहरी प्रवक्ता डिएसपी दीपक पातलीले जानकारी दिए । उनका अनुसार प्रहरी सहायक निरीक्षक शाहीसहित वडा प्रहरी कार्यालय नेपालगन्जका प्रहरी बरिष्ठ नायव निरीक्षक अमरबहादुर रावत, लागु औषध नियन्त्रण ब्यूरो नेपालगन्ज र लागु औषध नियन्त्रण ब्यूरो सुर्खेतको संयुक्त टोलीले ब्राउनसुगर विक्रेता नेपालगन्ज उपमहानगरपालिका ११ त्रिभुवन चोकबाट विपी चोकका ४४ वर्षीय रसुल अहमद कवडियालाई पक्राउ गरेको हो ।
सहायक निरीक्षक शाहीको टोलीले बिहीवार साँझ तुलसीपुर उपमहानगरपालिका–५ पुलचोकका २७ बर्षीय बिराज बिकलाई ४७ ग्राम ब्राउन सुगरसहित पक्राउ गरेको जिल्ला प्रहरी कार्यालय बाँकेले जनाएको छ । उनलाई नेपालगन्ज उपमहानगरपालिका ३ एकलैलीस्थित मुसाफिर खाना नजिकबाट पक्राउ गरिएको प्रहरीले जनाएको छ ।
पक्राउ परेका बिक तुलसीपुर क्षेत्रमा ब्राउनसुगरको कारोवार गर्दै आएको प्रहरीको अनुसन्धानले देखाएको छ । उनले दिएको सुराकीको आधारमा नेपालगन्ज विपी चोकका कवडियालाई लागु औषध ब्राउनसुगर सहित पक्राउ गरिएको डिसपी पातलीले जानकारी दिए । ‘विकले दिएको सूचनाको आधारमा नेपालगन्जमा लागु औषधको डिलर संचालन गर्दै आएका रसुल अहमद कवडियालाई पक्राउ गर्न सफल भयौँ,’ उनले भने, ‘पक्राउ परेकाहरुबाट सूचना संकलन गरि लागु औषधको मुख्य कारोवारीसम्म पुग्ने योजना बनाएका छौँ ।’
बाँके प्रहरीले शुक्रवार दिउँसो नेपालगन्ज बसपार्कको पछाडीबाट १६१ ग्राम खैरो हेरोइनसहित चार जनालाई नियन्त्रणमा लिएको छ । लागु औषध ब्यूरो नेपालगन्जका सहायक प्रहरी निरीक्षक नविन शाहीमाथि लागुऔषध कारोबारीले आक्रमण गरि भाग्ने क्रममा प्रहरीले उनीमाथि गोली प्रहार गरेको थियो । प्रहरीको गोली लागेर लागु औषध कारोबारी भारत रुपइडिहाका कार्तिक कुम्हार घाइते भएका छन् ।
लागु औषध कारोबारीलाई नियन्त्रणमा लिन बाँकेका प्रहरी प्रमुख एसपी रामप्रसाद घर्तिमगर आफै पनि खटिएका थिए । लागु औषधलाई प्राथमिकतामा राखेका एसपी घर्तिमगरले यसको नियन्त्रणका लागि मातहतका प्रहरी इकाईलाई कडा निर्देशन दिएका छन् । ‘लागु औषध कारोवारीको जालो पत्ता लगाउँदै छौँ । एक पछि अर्को पक्राउ गर्दै जाने योजना बाँके प्रहरीको छ,’ एसपी घर्तिमगरले भने ।
बाँके प्रहरीले प्रहरीले बुधवार राती नेपालगन्ज उपमहानगरपालिका १४ उधौपुर्वाबाट २२ लाख तीन हजार ९१५ रुपैयाँ र १५ ग्राम ५ सय मिलिग्राम ब्राउनसुगर सहित सोही ठाउँका रमेश लोनियालाई पक्राउ गरेको थियो ।
Discussion about this post