बाँके, भदौ ९ गते ।
नेपालगन्जका विभिन्न स्पा सेन्टरमा नाबालिग बालिकालाई काममा लगाएको आरोपमा प्रहरीले तीन जना सञ्चालकलाई पक्राउ गरेको छ।
जिल्ला प्रहरी कार्यालय बाँकेले नाबालिगलाई स्पामा काममा लगाइएको सूचनाका आधारमा सोमबार साँझ विभिन्न स्पा सेन्टरमा अनुगमन गरेको थियो। अनुगमनका क्रममा नाबालिगलाई कानुनविपरीत काममा लगाएको भेटिएपछि सञ्चालकलाई पक्राउ गरिएको प्रहरीले जनाएको छ।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतितसिंह राठौरले अनुगमनका क्रममा नाबालिग बालिका स्पामा काम गरिरहेको भेटिएपछि उनीहरूको उद्धार गरिएको बताए। ‘नाबालिगलाई कानुनविपरीत काममा लगाएको पाइएपछि सञ्चालकलाई पक्राउ गरेका हौं,’ उनले भने।
पक्राउ पर्नेमा नेपालगन्ज उपमहानगरपालिका–१० आदर्शनगरस्थित न्यू प्लेजर स्पाकी सञ्चालिका भारतीय नागरिक गुडिया खान, सोही वडामा रहेको आयुर्वेदिक रिल्याक्स स्पाकी सञ्चालिका दुर्गा थारू र नेपालगन्ज–२ न्युरोडस्थित रिल्याक्स स्पाका सञ्चालक तर्कराज देवकोटा छन्।
प्रहरीका अनुसार विभिन्न उमेर समूहका बालिकालाई स्पामा काममा लगाइएको भेटिएको थियो। उद्धार गरिएका बालिकालाई आवश्यक संरक्षण र परामर्शका लागि सम्बन्धित निकायसँग समन्वय गरिएको प्रहरीले जनाएको छ।
पक्राउ परेका तीनै जनाविरुद्ध बालबालिकासम्बन्धी ऐन, २०७५ बमोजिम अनुसन्धान भइरहेको र जिल्ला अदालत बाँकेबाट म्याद लिएर थप अनुसन्धान अघि बढाइएको राठौरले बताए।
‘नेपालगन्जमा सञ्चालनमा रहेका सबै स्पाको लगत राख्ने र त्यहाँ काम गर्ने व्यक्तिको विवरण नियमित रूपमा अद्यावधिक गर्ने तयारी गरेका छौं,’ उनले भने।
प्रहरीका अनुसार नेपालगन्जका क्यासिनो तथा स्पा सेन्टरमा सीमापार भारतका विभिन्न स्थानबाट दैनिक ठूलो सङ्ख्यामा भारतीय नागरिक आउने गरेका छन्। यस्ता व्यवसायमा बालबालिकाको प्रयोग तथा गैरकानुनी गतिविधि हुन नदिन निगरानी बढाइएको प्रहरीले जनाएको छ।
Discussion about this post