बाँके माघ ४ गते ।
यही माघ ११ गते नेपालगन्ज उद्योग वाणिज्य संघको आसन्न निर्वाचनकालागि समावेशी प्यानलले प्रतिवद्धता पत्र सार्वजनिक गरेको छ । नेपालगन्ज उद्योग बाणिज्य संघको निर्वाचनमा अब्दुल वाहिद मन्सुरी (चुन्ना) नेतृत्वको समावेशी प्यानलले आफ्नो प्रतिबद्धता(पत्र शनिवार सार्वजनिक गरेको हो ।
समावेशी प्यानलले एक समारोहका बीच समावेशी प्यानलका संरक्षक दामोदर आचार्य, निर्वाचन परिचालन समितिका संयोजक आईपी पोखरेल, नेपालगन्ज उद्योग बाणिज्य संघका केन्द्रिय सदस्य कृष्ण प्रसाद श्रेष्ठ, नेपालगन्ज उद्योग वाणिज्य संघका अध्यक्ष नन्दलाल वैश्य, बरिष्ठ उद्योगी चम्पालाल बोथरा लगायतले १४ बुँदे प्रतिबद्धता पत्र सार्वजनिक गरेका हुन ।
चुन्ना नेतृत्वको प्यानल विजयी भए उद्योगी व्यवसायीहरुको सुरक्षालाई मध्यनजर गर्दै रात्रीकालीन सडक बजार (स्ट्रिट मार्केट) लाई ब्यवस्थापन गर्ने र नेपालगन्ज शहरलाई गुल्जार बनाउने प्रतिबद्धता पत्रमा उल्लेख गरिएको छ । जारी गरिएको प्रतिबद्धता पत्रमा सामाजिक उत्तरदायित्वतर्फ ४ र ब्यवसायीक समस्यातर्फ १० गरी १४ बुँदा उल्लेख गरीएको छ ।
सामाजिक उत्तरदायित्वतर्फ बहुउद्देश्यीय सभागृह र प्रदर्शनी स्थलकालागि सरकारबाट भोगााधिकार प्राप्त सडक डिभिजन परिसरको जग्गा प्राप्तीलाई प्राथमिकता दिने, नेपालगञ्जमा उद्योगको संख्या बढाउने, नेपाल र भारत व्यापारको ढोका खोल्ने, एकीकृत भन्सार चेकपोष्ट, रेलमार्ग विस्तार, नौबस्ता औद्योगिक क्षेत्र, विशेष आर्थिक क्षेत्रजस्ता योजना कार्यान्वयन गर्दै सानादेखि ठूला लगानीका उद्योग, कलकारखाना स्थापना गर्नका लागि लगानी आकर्षित गर्ने प्रतिबद्धता गरिएको छ ।
व्यवसायिकतर्फ सीमापारी आकर्षित भइरहेका उपभोक्तालाई रोकिने, संघलाई सबै क्षेत्रका उद्योगी व्यवसायीको अपनत्व महसुस हुने विधानतः व्यवस्था मिलाइने, नेपालगञ्जलाई जडीबुटी भण्डारण, प्रशोधन र निर्यातको हक बनाउन बनाउन पहल गर्ने, सरकारले हतारमा ल्याएको सामाजिक सुरक्षा कोष, भीसीटीएस र प्यानबाट पारिश्रमिक भुक्तानीजस्ता निर्णय कार्यान्वयनका लागि पर्याप्त समय चाहिने भएकाले त्यसको पहल गर्ने, बैंक तथा बित्तीय संस्थाबाट लिने कर्जामा अस्थिर व्याजदरको समस्या समाधान गर्न निरन्तर प्रयास गर्ने, करको दर होइन, दायरा फराकिलो बनाउन राज्यको ध्यानाकर्षण गर्ने, नयाँ नयाँ जारी हुने कर प्रणालीका बारेमा उद्योगी, व्यवसायी जानकार नहुँदा थुप्रै समस्या सिर्जना हुने गरेकाले कर शिक्षा कार्यक्रमलाई प्रभावकारी रुपमा अघि बढाउने, सञ्चार क्षेत्रसँग सहकार्यलागि स्पष्ट कार्ययोजना बनाउने, उद्योगी व्यवसायीहरुलाई पर्न आउने व्यवसायिक पीरमर्कालाई शीघ्र तथा तत्काल सम्बोधन गर्नका लागि पदाधिकारीकै नेतृत्वमा हेल्प टिम बनाउने प्रतिबद्धता गरिएको छ ।
चुन्ना नेतृत्वको समावेशी प्यानलले उद्योग उपाध्यक्षमा आदेश कुमार अग्रवाल र बाणिज्य उपाध्यक्षमा ज्ञानेन्द्र कुमार श्रेष्ठलाई अघि सारेको छ ।
त्यस्तै सदस्यहरुमा क्रमशः टंक बहादुर धामी, अब्दुल वाहिद अन्सारी (बब्लु), श्याम सुन्दर अधिकारी, चिरञ्जीवी ओली, हरिलाल न्यौपाने, राजेश कुमार वैश्य, धर्मराज अर्याल, विजय भण्डारी (बासु), नहाँगीर मुसलमान, सुनिल कुमार बनिया, मन्दिरा पाण्डे र भिम बहादुर रानाभाट उम्मेदवार रहेका छन ।
Discussion about this post