सुर्खेत माघ ४ गते । कर्णाली प्रदेशको राजधानी वीरेन्द्रनगर सुर्खेतको बुद्धपथमा निर्माण गरिने बुद्ध सरोवरकालागि आजदेखि धम्म देशना कार्यक्रम शुभारम्भ गरिएको छ ।
कार्यक्रमको उद्घाटन गर्दै कर्णाली प्रदेश सरकार उद्योग पर्यटन वन तथा वातावरण मन्त्री नन्दसिंह बुढाले बुद्ध सरोवर निर्माणकोलागि प्रदेश सरकारले आवश्यक सहयोग गर्ने प्रतिवद्धता व्यक्त गर्नुभएको छ । मन्त्री बुढाले आफ्नो मन्त्रालयमा डिपिआर बुझाएको अवस्थामा समपुरक र विशेष अनुदान मार्फत सहयोग गर्न सक्ने बताउनुभएको हो ।
प्रत्येक कर्णालीबासीले आर्थिक सहयोग गरेर सरोवर बनाउँदा समय धेरै लाग्न सक्छ त्यसैले समृद्ध कर्णाली बनाउनकालागि यस्लाइ परियोजनाको रुपमा लिएर काम गर्दा छिटो निर्माण सम्पन्न हुने बताउनुभयो । उहाँले भन्नुभयो प्रदेश सरकारले कुनै पनि जातिलाई विभेद नगरेको भन्दै उहाँले कर्णालीका ऐतिहासीक घार्मिक सम्पदाहरुलाई पर्यटकीय क्षेत्रसंग जोडेर पर्यटनको विकास गर्न सकिने छ ।
त्यस्तै कर्णाली प्रदेश सभा सदस्य सिता नेपालीले बुढापाकाको भनाई अनुसार यो वीरेन्द्रनगरमा रहेको चौहान पोखरी हो यहाँ पहिला पोखरी नै थियो आज यही स्थानमा बुद्ध सरोवर निर्माण अभियान नै एउटा गौरवको विषय भएको बताउनुभयो । उहाँले भन्नुभयो कर्णालीमा अलि धेरै वेर पर्यटक भुल्ने ठाँउ नभएकोले यो सरोवर पर्यटक ध्यान तान्ने स्थल बनाउनुपर्ने छ । त्यसैले आफ्नो ठाँउ राम्रो बनाउनकालागि सबैले सहयोग गर्नुपर्ने बताउनुभयो ।
कार्यक्रममा धर्मगुरु प्रेमदोर्जे लामाले विगत केही बर्ष देखि जिल्ला प्रहरी कार्यालय सुर्खेत परिसरमा अपराधीलाई जस्तो गरेर बाँधेर राखिएको बुद्ध मुर्तीलाई सरकारले चाँडो निकास दिनुपर्ने बताउनुभयो ।
वीरेन्द्रनगर वडा नम्बर ६ स्थित बुद्धपथमा नेपालमा नै पहिलो पटक १ सय ८ फिट अग्लो बुद्धको मुर्ती सहित बौद्ध सरोवर निर्माण हुनेछ । बौद्धसरोवर निर्माणमा सहयोग संकलनको लागि आज (शनिबार) देखि ‘घम्म देशना’ सुरु गरिएको छ । यहि माघ ९ गते सम्म सञ्चालन हुने ‘घम्म देशना’बाट करिब ५० लाख सहयोग रकम संकलन हुने विश्वास आयोजकले लिएको छ ।
बुद्ध सरोवर निर्माणका लागि ९ करोड देखि १२ करोड लागत लाग्ने अनुमान गरिएको छ । भने २ बर्ष भित्र निर्माण सम्पन्न गर्ने लक्ष्य लिएको आयोजक बुद्ध सरोवर व्यवस्थापन समितिका अध्यक्ष पञ्च सिंह रोकाय खाम्पाले बताउनुभयो । बुद्ध सरोवरमा ३५ फिट अग्लो बौद्ध झण्डा अनुरुप पानीको फोहोरा पनि निर्माण गरिने अध्यक्ष रोकायले बताउनुभयो ।
आज घम्म देशनाको शुभारम्भ समारोहमा नगद र प्रतिवद्धता गरेर करिव १ लाख बराबरको दान संकलन भएको छ । उद्घाटन कार्यक्रममा कर्णाली प्रदेश सभा सदस्य सोसिला शाही १० हजार १ सय सहयोग गर्ने प्रतिवद्धता व्यक्त गर्नुभयो भने गुरुङ समाज परिषद्का केन्द्रीय सदस्य खगेन्द्र बहादुर गुरुङले ५१ हजार स्थानीय झकबहादुर सिजापति मगरले नगद ३१ हजार १ सय १ रुपैयाँ सहयोग गर्नुभयो ।
वीरेन्द्रनगर नगरपालिका नगर विकास समितिको ८ कट्ठा क्षेत्रफलमा सरोवर निर्माण गरिने सरोवरको लागि इ–सेवा मार्फत पनि सहयोग गर्न सकिने समितिका महासचिव जीवनकुमार शाक्यले जानकारी दिँदै इ-सेवाबाट ९८५८०४७२८७ मा दान गर्न सकिने बताउनुभयो ।
यही माघ ३ गतेबाट सञ्चालन हुने भनिएको धम्म देशना कार्यक्रम मौसमका कारण आजबाट शुरु भएको हो ।
Discussion about this post