सुर्खेत बैशाख १० गते । सुर्खेतको चौकुने गाउँपालिकाका १ र २ नम्बर वडा लगाम र ३ नम्बर वडा बेतानका ८७ जनाको रिर्पोट नेगेटिभ आएको छ । मंगलबार गाउँपालिकाको १, २ र ३ नम्बर वडामा गरिएको र्यापिड टेस्टमा ८७ जनाकै रिर्पोट नेगेटिभ आएको गाउँपालिकाका अध्यक्ष धीरबहादुर शाहीले जानकारी दिए ।
वडा न. १ का ३५ जना, वडा नम्बर २ का ३८ जना र वडा नम्बर ३ का १४ जना गरी ८७ जनामा परीक्षण गर्दा सबैको रिर्पोट नेगेटिभ आएको अध्यक्ष शाहीले जारी गरेको विज्ञप्तीमा उल्लेख छ । एक जनाको स्वाब संकलन गरेर थप परीक्षणका लागि सुर्खेत पठाइएको छ ।
यसअघि चौकुने गाउँपालिकाको ६, ७, ८, ९ र १० वडामा परीक्षण गरिएका १ सय ९४ जनाको रिर्पोट पनि नेगेटिभ आएको थियो । भारत लगायतका देशबाट चौकुनेमा चैत १ गतेदेखि १५ गतेसम्म ४ सय २१ जना भित्रिएको तथ्यांक छ । तीमध्ये अहिलेसम्म २ सय ८१ जनाको परीक्षण गरिएको छ ।
गाउँपालिकाको एक मात्रै जीवन ज्योती स्कुलको क्वारेन्टाइनमा बसेका १४ जनाको परीक्षण गर्दा पनि रिर्पोट नेगेटिभ आएको थियो । सबै गरेर अहिलेसम्म २ सय ९५ जनाको परीक्षण गरिएपनि अझै १ सय २६ जनाको परीक्षण गर्न बाँकी छ ।
विदेशबाट आएका सबैको परीक्षण गरेर गाउँपालिकालाई कोरोना जोखिममुक्त बनाउने योजना छ । गाउँपालिकाले कोरोना रोकथाम र नियन्त्रणका लागि सबै सीमानाका बन्द गरेको छ भने जनचेतनाका लागि सर्वसाधारणलाई साबुन र मास्क तथा स्वास्थ्यकर्मीलाई सुरक्षा सामग्री प्रदान गरेको छ ।
Discussion about this post