बाँके भदौ २ गते ।
नेपालगन्ज मेडिकल कलेजमा उपचारको क्रममा कोरोना संक्रमणबाट मृत्यु भएका नेपालगञ्ज उपमहानगरपालिका वडा नम्बर ५ का ६२ वर्षिय एक पुरुषको आज अन्त्यष्टि गरिएको छ ।
उनको स्वास्थ्य मन्त्रालयको गाइडलाइन अनुसार नेपाली सेनाले अन्त्यष्टि गरेको हो । बाँकेका प्रमुख जिल्लाअधिकारी रामबहादुर कुरुङवाङको नेतृत्वको टोलीमा नेपाली सेना लगायतको उपस्थितिमा मुस्लिम परम्परा अनुसार नेपालगञ्जको कब्रिस्तानमा नमाज पढेपछि सेनाले सलामी दिएर उनको अन्त्यष्टि गरिएको थियो ।
मृतक जडिबुटि व्यवसायी हुन् । अन्तिम संस्कार परम्परा अनुसार गर्न दिएकोमा कब्रिस्तानका अध्यक्ष, जडिबुटी व्यवसायी संघका अध्यक्ष, तथा प्रदेश ५ का सभासद मोहम्मद याकुब अन्सारीले प्रमुख जिल्ला अधिकारी रामबहादुर कुरुङवाङ , प्रमुख सेनानी नहकुल थापा, नेपाल प्रहरीका प्रमुख लगायतको टोलिलाई धन्यवाद दिएका छन् ।
मृतकको भदौ १ गते सोमबार दिउँसो ३ बजे कोरोना पोजेटिभ भएको रिपोर्ट आएको थियो । सोमबार राति ११ः४० बजे अस्पतालमा उपचार गर्दा गर्दा उनको मृत्यु भएको कोरोना फोकलपर्सन श्रेष्ठले जानकारी दिएका छन् । उनलाई दुबै फोक्सोमा निमोनिया भएको थियो ।
‘गम्भीर अवस्थामा अस्पतालको आइसियुमा उपचाररत कोरोना संक्रमित ६२ बर्षीय पुरुषलाई प्लाज्मा थेरापीबाटै उपचार गरेर ज्यान जोगाउने हाम्रो हरसम्भव प्रयास थियो नेपालगन्ज मेडिकल कलेजका सहनिर्देशक डा रोमन किदवाईले भन्नुभयो –‘तर संक्रमणबाट मुक्त भएकाहरुले ब्लड डोनेट नगर्दा प्लाज्मा थेरापीबाट उपचार गर्ने प्रयास हुन सकेन् ।’
सरकारले नेपालगन्ज मेडिकल कलेज शिक्षण अस्पताल कोहलपुर र भेरी अस्पताल नेपालगन्जलाई प्लाज्मा थेरापीबाट संक्रमितको उपचार गर्न अनुमति दिएको छ । कोरोनाबाट गम्भीर विरामी भएकाहरुलाई प्लाज्मा थेरापीबाट उपचार गर्ने गरिएको छ ।
नेपालमा पनि एकजना चिकित्सक प्लाज्मा थेरापी उपचार पद्धतिबाट निको भइसकेका छन् । अहिले वि पी कोइराला प्रतिष्ठान धरानले एकजना कोरोना संक्रमितको प्लाज्मा थेरापीबाट उपचार गरिरहेको छ ।
प्लाज्मा थेरापीबाट उपचार अनुमति पाएका बाँकेका भेरी अस्पताल र नेपालगन्ज मेडिकल कलेज कोहलपुरले यो सेवा सुरु गरेका छैनन् । तस्बिर: रुद्र सुवेदी
Discussion about this post