बाँके असार ८ गते ।
बाँकेका सरकारी कार्यालयहरु आजदेखि खुलेका छन । कार्यालयमा भिडभाड नहुने गरी सेवा प्रवाह व्यवस्थित गर्ने गरी सरकारी कार्यालयहरु खुलेका हुन् । कोरोना भाइरसको दोस्रो लहर सुरु भएसँगै बैशाख ९ गतेदेखि नेपालगन्जका र बैशाख १३ गते देखि जिल्लाका सबै सरकारी, बैंक तथा वित्तिय संस्थाहरु बन्द थिए ।
भाइरस संक्रमणको जोखिम कम हुँदै गएपछि करिव दुई महिनादेखि बन्द रहेका बैंक तथा वित्तिय र सरकारी कार्यालयहरु आजदेखि खुलेका छन् । बाँकेका प्रमुख जिल्ला अधिकारी शिवराम गेलालले जोखिम कायमै रहेपनि स्वास्थ्य सुरक्षाका मापदण्ड पालना गरेर कार्यालयहरु खोलिएको जानकारी दिनुभयो ।
यस्तै दैनिक उपभोग्य वस्तु तथा अत्यावश्यक सामाग्री खरिद विक्रीका लागि विहान ९ बजेदेखि अपरान्ह ४ बजेसम्म पसल व्यवसाय खुला भएका छन् । तर विद्यालय, कलेज, ट्युशन सेन्टर, तालिम केन्द्र भने खुल्ने छैनन् ।
प्रशासनले जारी गरेको निषेधाज्ञा भने यही असार १४ गतेसम्म कायमै रहने छ । उता कैलालीमा आजदेखि निषेधाज्ञा थप खुकुलो पारिएको छ । निषेधाज्ञाको स्वरूप परिवर्तन गरि थप एक साता निषेधाज्ञा लम्वाउने निर्णय गरेको स्थानीय प्रशासनले आजदेखि अत्यावश्यक सामग्री प्रवाह गर्ने बाहेक सबै खाले पसलहरु खुलेका छन् ।
प्रत्येक दिन बिहान ६ बजेदेखि दिउँसो ३ बजेसम्म पसलहरु खुला गर्ने निर्णय भएको कैलालीका प्रमुख जिल्ला अधिकारी खगेन्द्र रिजालले जानकारी दिनुभयो । उद्योग, कलकारखाना लगायत, सार्वजनिक तथा निजी निर्माण कार्य सञ्चालन गर्न पनि पाइने भएको छ ।
कोरोना महामारीको दोस्रो लहर सुरु भएपछि कैलालीको स्थानीय प्रशासनले बैशाख १६ गतेदेखि क्रमिक रुपमा निषेधाज्ञा थप्दै आएकोमा अब असार १५ गतेसम्म निषेधाज्ञा लम्बाईएको छ ।
Discussion about this post