बाँके चैत ९ गते।
बाँके यूनेस्को क्लबले हेलन केलर इन्टरनेशनल नेपालसँगको साझेदारी तथा स्वास्थ्य कार्यालय बाँकेको समन्वयमा नेपालगञ्ज उपमहानगरपालिकामा ‘जीवनका लागि पोषण परियोजना’ अन्तर्गत जिल्ला स्तरीय परियोजना प्रारम्भ कार्यशाला सम्पन्न गरेको छ।
कार्यशालाको उद्देश्य जिल्लास्तरका सरोकारवालाहरूलाई परियोजनाको लक्ष्य, रणनीति तथा कार्यान्वयन प्रक्रियाबारे अभिमुखीकरण गर्नु रहेको थियो। कार्यक्रमको औपचारिक उद्घाटन स्वास्थ्य कार्यालय बाँकेकी पोषण फोकल पर्सन बसन्ती मल्लले गरिन्।
नेपालगञ्ज उपमहानगरपालिकाका प्रमुख प्रशान्त बिष्टको अध्यक्षतामा सम्पन्न कार्यक्रममा जिल्ला समन्वय समिति बाँकेका प्रमुख ज्ञानेंद्र कुमार चौधरी प्रमुख अतिथिका रूपमा उपस्थित थिए।
कार्यक्रमको प्रारम्भमा हेलन केलर इन्टरनेशनलका फिल्ड अफिसर लिल बहादुर नेपालीले स्वागत मन्तव्य व्यक्त गर्दै लुम्बिनी प्रदेश र बाँके जिल्लामा कुपोषणको अवस्था, परियोजनाको संरचना तथा कार्यान्वयन रणनीतिबारे जानकारी गराए। अन्तरक्रियात्मक छलफलमा सहभागीहरूले सक्रिय सहभागिता जनाउँदै आफ्ना सुझावहरू प्रस्तुत गरेका थिए।
शिक्षा विकास तथा समन्वय इकाइका प्रमुखले विद्यालयस्तरमा पोषण सुधारका लागि प्रधानाध्यापकहरूको सक्रिय भूमिका आवश्यक रहेको बताए। हेलन केलर इन्टरनेशनलका प्रदेश प्रबन्धक शशि देव शाहले सहभागीहरूको जिज्ञासाको जवाफ दिँदै परियोजनाले तीव्र कुपोषण व्यवस्थापनमा सहयोग पु¥याउने तथा सरकारद्वारा सञ्चालन भइरहेको सामूहिक जाँच र उपचार कार्यक्रमलाई पूरक रूपमा सघाउने बताए।
समापन सत्रमा बाँके यूनेस्को क्लबका सह–अध्यक्ष निरज गौतमले कुपोषण न्यूनीकरण कार्यक्रमलाई प्राथमिकतामा राख्दै सामूहिक प्रतिबद्धता सुदृढ गर्नुपर्नेमा जोड दिए। वडा नं. २० का वडा अध्यक्ष कौशल कुमार धोबीले कुपोषणको प्रभाव पुस्तौंदेखि देखिने भएकाले वडा स्तरबाटै कार्यक्रमलाई प्रभावकारी रूपमा सहयोग गर्ने प्रतिबद्धता व्यक्त गरे।
स्वास्थ्य कार्यालय बाँकेकी प्रमुख सुनिता पौडेलले लुम्बिनी प्रदेश तथा बाँके जिल्लामा कुपोषणको अवस्था अझै चिन्ताजनक रहेको उल्लेख गर्दै सुधारका लागि सबै क्षेत्रको संयुक्त प्रयास आवश्यक रहेको बताइन्। त्यसैगरी जिल्ला समन्वय समिति बाँकेका प्रमुख ज्ञानेंद्र कुमार चौधरीले आमा तथा बालबालिकामा देखिएको कुपोषण न्यूनीकरणका लागि व्यवहारगत परिवर्तन आवश्यक रहेकोमा जोड दिए।
कार्यक्रममा नेपालगञ्ज उपमहानगरपालिकाका प्रमुख प्रशान्त बिष्टले पछाडि परेका समुदायलाई प्राथमिकतामा राख्दै प्रभावकारी कार्यान्वयनका लागि सशक्त समन्वय र सहकार्य अपरिहार्य रहेको बताए।
कार्यशालामा जिल्ला समन्वय समिति, जिल्ला प्रशासन कार्यालय, स्वास्थ्य कार्यालय, कृषि ज्ञान केन्द्र, पशु सेवा कार्यालय, वडा प्रतिनिधि, स्वास्थ्यकर्मी तथा पत्रकारलगायत विभिन्न सरोकारवालाको सहभागिता रहेको थियो। कार्यक्रममा कुल ५६ जना सहभागीहरूको उपस्थिति रहेको जनाइएको छ।
कार्यक्रममा हेलन केलर इन्टरनेशनलका प्रदेश प्रबन्धक शशि देव शाह, रमेश प्रसाद अधिकारी तथा बाँके यूनेस्को क्लबका सह–अध्यक्ष निरज गौतम, उपाध्यक्ष पञ्चम गुरुङ र कार्यकारी निर्देशक रवि कुमार तुलाधरको पनि सहभागिता रहेको थियो।
Discussion about this post