बाँके चैत १६ गते।
गर्मीयाम सुरु भएसँगै बढ्दो आगलागीको जोखिमलाई ध्यानमा राख्दै नेपालगञ्ज उपमहानगरपालिकाले गृहिणी महिलालाई लक्षित गरी घरायसी आगो नियन्त्रणसम्बन्धी पुनर्ताजगी तालिम सञ्चालन गरेको छ।
सुपर परियोजनाअन्तर्गत वडा नं. ३ र ७ का ४० जना सामुदायिक आपतकालीन प्रतिकार्य समूहमा आबद्ध महिला सदस्यहरूको सहभागितामा उक्त तालिम आयोजना गरिएको हो।
दैनिकजसो भइरहेका आगलागीका घटनालाई न्यूनीकरण गर्ने तथा सम्भावित क्षति कम गर्ने उद्देश्यले तालिम सञ्चालन गरिएको उपमहानगरपालिकाले जनाएको छ।
नेपालगञ्ज उपमहानगरपालिकाको वारुण यन्त्र शाखाका प्रमुख झयनबहादुर खड्काका अनुसार वडा नं. ३ र ७ पुरानो बस्ती क्षेत्र भएकाले त्यहाँ आगलागीको जोखिम उच्च रहँदै आएको छ। सोही कारण ती क्षेत्रका गृहिणी महिलालाई लक्षित गरी तालिम सञ्चालन गरिएको उनले बताए।
उनका अनुसार तालिममा आगो निभाउने प्रभावकारी उपाय, घरमै उपलब्ध सामग्री प्रयोग गरेर आगो नियन्त्रण गर्ने तरिका तथा अपनाउनुपर्ने र नअपनाउनुपर्ने सावधानीबारे व्यवहारिक ज्ञान प्रदान गरिएको छ।
बाँकेका विपद् सूचना व्यवस्थापन अधिकृत रुपन ज्ञवालीले सुपर परियोजनाअन्तर्गत तयार गरिएका ४०० स्वयंसेवकमध्ये ४० जनालाई घरायसी आगो नियन्त्रणसम्बन्धी विशेष सीप प्रदान गरिएको जानकारी दिए।
उनले आगलागी हुँदा दमकल समयमै पुग्न नसक्ने वा ढिलाइ हुने अवस्थामा तालिमप्राप्त स्वयंसेवकहरूले समुदायमै तत्काल प्रतिक्रिया जनाई क्षति न्यूनीकरण गर्न सक्ने बताए।
यसैगरी, वडा नं. ६ का अध्यक्ष तथा सुपर परियोजना संयोजक समिर प्रताप सिंहले यस्ता तालिमले समुदायस्तरमै आगलागी नियन्त्रणमा महत्वपूर्ण भूमिका खेल्ने विश्वास व्यक्त गरे। उनका अनुसार भान्साबाट हुने आगलागीका घटनालाई कम गर्न तथा जोखिम न्यूनीकरणमा तालिम प्रभावकारी हुने अपेक्षा गरिएको छ।
तालिममा सहभागी गृहिणी महिलाहरूले आगलागी रोकथाम, आगो फैलिन नदिन तथा नियन्त्रण गर्ने विभिन्न व्यावहारिक उपायहरू सिकेको बताएका छन्।
Discussion about this post