बर्दिया चैत ११ गते ।
गर्मी बढेसँगै बर्दिया राष्ट्रिय निकुञ्जभित्रका प्राकृतिक पानीका स्रोत सुक्न थालेपछि वन्यजन्तुलाई पानी उपलब्ध गराउन निकुञ्जले कृत्रिम पोखरी निर्माण सुरु गरेको छ।
निकुञ्जले यस वर्ष चार स्थानमा कचौरा आकारका कृत्रिम पोखरी निर्माण गरेको जनाएको छ। पानी ढुवानी गर्न सवारीसाधन सहज रूपमा पुग्न सक्ने स्थान छनोट गरी ती पोखरी बनाइएको निकुञ्जको भनाइ छ। ती पोखरीमा दैनिकजसो पानी भर्ने व्यवस्था मिलाइएकाले वन्यजन्तुलाई निरन्तर पानी उपलब्ध गराइने बताइएको छ।
निकुञ्जका अनुसार गर्मीयाममा प्राकृतिक स्रोतहरू सुक्ने तथा कृत्रिम पोखरीमा कुनै समस्या देखिए तत्काल समाधान गर्न कठिन हुने सम्भावनालाई ध्यानमा राख्दै वैकल्पिक उपायस्वरूप यो अवधारणा अघि बढाइएको हो। निर्माण गरिएका पोखरीहरू नियमित अनुगमनमा राखिने र पानीको सतह घटेपछि तुरुन्तै ढुवानीमार्फत पुनः भर्ने व्यवस्था मिलाइएको छ।
निकुञ्जका प्रमुख संरक्षण अधिकृत डा. अशोककुमार रामले प्राकृतिक स्रोतहरू सुक्दै गए पनि यस्ता कृत्रिम पोखरीमार्फत वन्यजन्तुलाई सहज रूपमा पानी उपलब्ध गराउन सकिने बताए।
करिब ९६८ वर्ग किलोमिटर क्षेत्रफलमा फैलिएको बर्दिया राष्ट्रिय निकुञ्ज हुँदै कर्णाली नदी बग्ने गर्दछ। पछिल्लो समय कर्णाली नदीको बहाव पश्चिमतर्फ मोडिँदै जाँदा पूर्वतर्फको गेरुवा भंगालो क्षेत्रमा पानीको कमी देखिएको छ। यसले निकुञ्जभित्रका वन्यजन्तुलाई थप समस्या पारिरहेको निकुञ्जले जनाएको छ।
निकुञ्ज प्रशासनले आगामी वर्षहरूमा यस्ता कृत्रिम पोखरीको संख्या थप विस्तार गर्दै लैजाने योजना रहेको प्रमुख संरक्षण अधिकृत डा. रामले जानकारी दिए।
Discussion about this post