बाँके असार १५ गते ।
हरेक वर्ष असार १५ गते मनाइने धान दिवस बुधबार खेतमा काम गरी दही च्यूरा खाएर मनाइँदैछ। बाँकेमा असार १५ अर्थात धान दिवस विभिन्न कार्यक्रम गरि मनाइदै छ ।
धान दिवस तथा रोपाइँ महोत्वसको अवसरमा बाँकेको राप्तीसोनारीमा विशेष कार्यक्रम गरिएको छ । बाँकेमा अहिलेसम्म तीन प्रतिशतमात्रै रोपाइँ भएको छ ।
समयमै बर्षा नभएकाले रोपाइँ ढिलाइ भएको कृषि ज्ञान केन्द्र बाँकेका प्रमुख सागर ढकालले बताउनुभयो । विसं २०६१ मङ्सिर २९ गते मन्त्रिस्तरीय निर्णय गरी २०६२ असार १५ गतेदेखि राष्ट्रिय धान दिवस मनाउन थालिएको हो।
कृषि प्रधान देश भएकाले नेपालका अधिकांश मानिसको पेशा खेतीपाती हो।किसान वर्षभरका लागि छाक जुटाउन यो महिना खेतीमा व्यस्त हुन्छन्।
आजका दिन असारे भाकामा लोकदोहोरी गाउँदै छुपुछुपु हिलोमा धान रोपिन्छ। ‘छुपु र छुपु हिलोमा धान रोपेर छोडौँला, बनाई कुलो लगाई पानी आएर गोडौँला’ जस्ता लोक लयका गीत गाएर खेतमै रमाइलो पनि गरिन्छ।
मध्य गर्मीको यो समयमा युवा लाठे र युवती रोपाहारले खेतका गराको हिलो छ्यापाछ्याप गरेर मनोरञ्जन गर्छन्। कामको चटारोले थकित भएका किसान शक्तिप्राप्तिका लागि दही च्यूरा खान्छन्।
Discussion about this post