बाँके चैत ५ गते ।
जल तथा मौसम विज्ञान विभागले लुम्बिनी र कोशी प्रदेशका विभिन्न जिल्लामा शुक्रबार र शनिबार तीव्र हावाहुरी चल्ने सम्भावना रहेको भन्दै सतर्कता अपनाउन आग्रह गरेको छ ।
विभागले बिहीबार सार्वजनिक गरेको मौसम पूर्वानुमानअनुसार चैत ६ गते शुक्रबार लुम्बिनी प्रदेशका दाङ, बाँकेको नेपालगन्जलगायतका क्षेत्रमा तीव्र हावाहुरी चल्ने सम्भावना रहेको जनाएको हो ।
त्यसैगरी शनिबार कोशी प्रदेशका मोरङको विराटनगर, धनकुटा तथा धरान आसपासका क्षेत्रहरूमा पनि हावाहुरी चल्ने अनुमान गरिएको छ ।
विभागका अनुसार हावाहुरीको गति झन्डै ३३ मिटर प्रति सेकेन्ड (करिब ११९ किलोमिटर प्रतिघण्टा) सम्म पुग्न सक्नेछ ।
हावाहुरीका कारण रुख ढल्ने, कमजोर संरचना तथा छाना उड्ने, साथै विद्युत् र सञ्चार सेवा प्रभावित हुने जोखिम रहेकाले सर्वसाधारणलाई आवश्यक सतर्कता अपनाउन विभागले अनुरोध गरेको छ ।
Discussion about this post