बाँके चैत ६ गते।
नेपालगञ्जमा द्रुत डाँक सेवा (इएमएस) सम्बन्धी अन्तरक्रिया कार्यक्रम सम्पन्न भएको छ। हुलाक सेवा विभागद्वारा बिहीबार आयोजित उक्त कार्यक्रम जिल्ला हुलाक कार्यालय बाँकेको समन्वय तथा सहजीकरणमा सम्पन्न भएको हो।
कार्यक्रममा सरोकारवालाबीच द्रुत डाँक सेवाको गुणस्तर, विस्तार र प्रभावकारिताबारे गहन छलफल गरिएको थियो। अध्यक्षता गर्दै हुलाक सेवा विभागका महानिर्देशक मनमाया भट्टराई पंगेनीले सेवामा सुधार र नवप्रवर्तन आवश्यक रहेको उल्लेख गरिन्। उनले समयानुकूल सेवा प्रदान गर्दै जनअपेक्षाअनुसार गुणस्तरीय र विश्वसनीय सेवा दिन विभाग प्रतिबद्ध रहेको बताइन्।
हुलाक सेवा विभागका निर्देशक लिलाराज पौडेलले हुलाक सेवाको विगत र वर्तमान अवस्थाबारे जानकारी गराए भने शाखा अधिकृत शालिकराम बस्यालले द्रुत डाँक सेवाको प्रक्रिया र सञ्चालनबारे विस्तृत जानकारी प्रस्तुत गरे।
प्रमुख अतिथि जिल्ला समन्वय समिति बाँकेका प्रमुख ज्ञानेन्द्र कुमार चौधरीले ग्रामीण क्षेत्रमा सेवा विस्तारमा विशेष जोड दिए। उनले दूरदराजका नागरिकसम्म छिटो र सहज सेवा पुर्याउन स्थानीय तहसँग समन्वय गरी सेवा विस्तार गर्नुपर्ने धारणा राखे।
यसैगरी, बाँकेका सहायक प्रमुख जिल्ला अधिकारी महेशकुमार गुरुङले सेवा प्रभावकारी बनाउन सरकारी निकायबीच समन्वय अपरिहार्य रहेको बताए। उनले सार्वजनिक सेवामा पारदर्शिता र जवाफदेहिता कायम गर्दै जनविश्वास अभिवृद्धि गर्नुपर्नेमा जोड दिए।
कार्यक्रममा सहभागीहरूले द्रुत डाँक सेवाको प्रभावकारिता अभिवृद्धि गर्न विभिन्न सुझाव प्रस्तुत गरेका थिए। उनीहरूले सेवा विस्तार, जनचेतना वृद्धि तथा प्रविधिको प्रयोगलाई प्राथमिकता दिनुपर्नेमा जोड दिएका थिए।
कार्यक्रममा स्वागत मन्तव्य जिल्ला हुलाक कार्यालय बाँकेका प्रमुख गजेन्द्र प्रकाश थारुले व्यक्त गरेका थिए।
Discussion about this post