काठमाडौं असार २७ गते ।
नेपाली कांग्रेस केन्द्रीय समितिको बैठक आज बस्दै छ । अघिल्लो बैठकको ठिक एक वर्षपश्चात् असार २७ गते आज बैठक बस्न लागेको छ ।
विधानअनुसार प्रत्येक दुई महिनामा बस्नुपर्ने बैठक कहिले सत्ता राजनीति मिलाउन त कहिले पार्टी नेता बालकृष्ण खाँण भ्रष्टचार मुद्दामा फसेपछि मिति तोकेर पनि सर्दै आयो । सभापति शेरबहादुर देउवाले विधानमाथि आक्रमण गर्दा इतर समूहका नेता शेखर कोइरालासहित महामन्त्रीद्वय विश्वप्रकाश शर्मा र गगन थापा पनि मुर्खदशक बने ।
उनीहरुले सार्वजनिक खपतका लागि बोल्नबाहेक केही गर्न सकेनन् । कांग्रेसको भोलिको बैठकको मुख्य एजेन्डा तय भइसकेका छन् । पार्टी सहमहामन्त्री भिष्मराज आङ्देम्बेका अनुसार बिहान ९ बजे पार्टी पदाधिकारी र पूर्वपदाधिकारी बसेर एजेन्डालाई अन्तिम रूप दिइनेछ ।
एजेन्डा बनाइरहँदा पार्टीका प्रभावशाली नेता तथा सभापतिका विश्वासपात्र बालकृष्ण खाणँको विषयमा के गर्ने भन्ने अन्योल कायमै छ । नक्कली भुटानी शरणार्थी प्रकरणमा जेलमा रहेका खाँणलाई निलम्बन गर्नुपर्ने पक्षमा सभापति देउवा छैनन् । देउवाले बैठक बोलाउँदैमा खाँणको विषय नउठोस् भन्ने चाहेको एक केन्द्रीय सदस्य बताउँछन् ।
“सभापतिज्यू खाँणको विषय उठोस् भन्ने चाहनुहुन्न । उठे पनि यसको ‘सेफ ल्यान्डिङ’को पक्षमा हुनुहुन्छ । त्यसकारण यो विषय केन्द्रीय समितिमा कसरी उठ्छ भन्ने छ,” ती केन्द्रीय सदस्यले भने । सभापति देउवानिकट एक पदाधिकारी भने खाँण एक व्यक्तिको विषयमा सभापतिले केही नबोलेको दाबी गर्छन् ।
उनले एजेन्डा फाइनल नभएकाले यो विषयमा थप बोल्न नसकिने बताए । “उहाँले व्यक्तिको विषयमा केही भन्नुभएको छैन । एजेन्डा फाइनल बिहानमात्र हुन्छ,” उनले भने ।गएको वर्ष असार २७ गतेदेखि साउन २ गतेसम्म कांग्रेस केन्द्रीय समिति बैठक बसेको थियो । १३ बुँदे निर्णय गर्दै कांग्रेस प्रदेश र प्रतिनिधिसभा निर्वाचनमा होमिएको थियो ।
त्यसपश्चात् मिति तोक्दै बैठक सार्ने काममा सभापति र पार्टी नेतृत्व लागेको थियो ।एक वर्षपछि बस्न लागेको बैठकको औपचािरक एजेन्डा पूर्ण रूपमा तय नभए पनि मोटामोटी एजेन्डाहरू तय भएको नेताहरू बताउँछन् । पार्टी सहमहामन्त्री आङ्देम्बेका अनुसार अहिले देखिएका समसामयिक विषयहरू नै बैठकको एजेन्डा भएको बताउँछन् ।
कांग्रेसको मंसिर ४ मा सम्पन्न भएको निर्वाचनको समीक्षा गरेकै छैन । गठबन्धन गर्दा पार्टी संगठनप्रति कार्यकर्ताको आशा र निराशाको विषयमा समीक्षा हुने देखिन्छ । यस्तै, पार्टीको नीति महाधिवेशनको विषय पनि अर्को मुख्य एजेन्डा भएको आङ्देम्बे बताउँछन् ।
Discussion about this post