बाँके असोज ७ गते ।
बाँकेको खजुराका स्थानीय बासिन्दाले धार्मिक महायज्ञ मार्फत मुठीदान सङ्कलन गरी निर्माण सुरु गरेको सुशील कोइराला प्रखर क्यान्सर अस्पताललाई नेपाल सरकारले प्राथमिकता दिएर बजेट विनियोजन गरेको छ ।
२०७२ सालमा नेपाल सरकारलाई हस्तान्तरण गरिएको क्यान्सर अस्पताल सञ्चालनका लागि चालु आर्थिक वर्ष २०८०–८१ मा पुँजीगत र चालु खर्चतर्फ दोब्बर बढी विनियोजन भएको छ ।
सुशील कोइराला प्रखर क्यान्सर अस्पताल विकास समितिका अध्यक्ष टेकेन्द्र मल्लका अनुसार चालु आवमा पुँजीगततर्फ १५ करोड र चालुतर्फ १० करोड गरी २५ करोड रुपियाँ बजेट विनियोजन भएको छ ।
अस्पताल विकास समितिका अध्यक्ष मल्लले भन्नुभयो, ‘कर्मचारी दरबन्दी स्वीकृत लगायतका माग सम्बोधन नभए पनि सरकारले बजेट विनियोजनमा प्राथमिकता दिएको छ ।’ स्वास्थ्य तथा जनसङ्ख्या मन्त्रालयले अघिल्ला आर्थिक वर्षहरूमा पुँजीगततर्फ ६ करोड र चालु खर्चतर्फ चार करोड गरी १० करोड रुपियाँ मात्रै बजेट विनियोजन गर्दै आएकोमा यस वर्ष उल्लेख्य मात्रामा बजेट विनियोजन भएको अध्यक्ष मल्लले जानकारी दिनुभयो ।
क्यान्सर अस्पताल निर्माणको प्रारम्भिक सुरुवात प्रखर परोपकार मिसनमार्फत खजुराबासीले गरे पनि नेपाल सरकारको आर्थिक सहयोगमा सम्पन्न भएको छ । बजेट थप भएपछि क्यान्सरको उपचारका लागि नयाँ उपकरण सञ्चालन तथा अन्य सेवा सञ्चालनका लागि सहयोग पुग्ने अस्पताल विकास समितिले जनाएको छ । अस्पतालमा शुक्रबारदेखि सम्पूर्ण साधारण शप्याहरु निःशुल्क गरिएको छ ।
साथै अस्पतालमा भर्ना भएका अति विपन्न बिरामीलाई निःशुल्क खानाको पनि व्यवस्था भएको अस्पतालका निर्देशक डा। नीरज भट्टराईले जानकारी दिनुभयो ।
अस्पतालमा जडानको क्रममा रहेको लिन्याक मेशिन सञ्चालनमा आएसँगै क्यान्सरका सबै उपचार सेवा खजुराबाटै दिन सकिने छ ।
Discussion about this post