बाँके चैत २१ गते ।
नेपालगन्ज क्षेत्रमा लागूऔषध सेवन तथा कारोबार बढ्दो क्रममा देखिएको बीच जिल्ला प्रहरी कार्यालय बाँकेले ब्राउन सुगरसहित चार जनालाई पक्राउ गरेको छ।
जिल्ला प्रहरी कार्यालय बाँकेका प्रहरी प्रवक्ता डीएसपी दीपक पातलीका अनुसार नेपालगन्ज उपमहानगरपालिका–१ स्थित राष्ट्रिय वाणिज्य बैंक नजिक नियमित चेकजाँचका क्रममा जिल्ला प्रहरी कार्यालय बाँके र लागूऔषध नियन्त्रण ब्यूरो शाखा कार्यालय नेपालगन्जबाट खटिएको संयुक्त टोलीले उनीहरुलाई नियन्त्रणमा लिएको हो।
उनका अनुसार पक्राउ परेकाहरूको साथबाट करिब १४४ ग्राम ७१० मिलिग्राम लागूऔषध (ब्राउन सुगर जस्तो देखिने खैरो धुलो पदार्थ) बरामद गरिएको छ। “उक्त परिमाण उल्लेखनीय भएकाले यसलाई गम्भीर रूपमा लिएर अनुसन्धान अगाडि बढाइएको छ,” डीएसपी पातलीले बताए।
पक्राउ पर्नेहरूमा नेपालगन्ज उपमहानगरपालिका–१६ जयसपुरका सोनु जोलाहा, इरफान जोलाहा, मन्ना जोलाहा र वडा नं. १८ का सुमेर शेष रहेका छन्।
डीएसपी पातलीका अनुसार उनीहरूलाई नियन्त्रणमा लिएर लागूऔषध सम्बन्धी कसुरअन्तर्गत अनुसन्धान तथा कानुनी प्रक्रिया अघि बढाइएको छ। “लागूऔषध ओसारपसार तथा कारोबारमा संलग्न जो–कोहीमाथि कडा कारबाही गरिनेछ,” उनले भने, “सीमावर्ती क्षेत्र भएकाले निगरानी अझ कडाइका साथ बढाइएको छ।”
प्रहरीले लागूऔषध विरुद्धको अभियानलाई निरन्तर सशक्त बनाउँदै लैजाने प्रतिबद्धता जनाएको छ।
Discussion about this post