बाँके चैत २२ गते।
नेपालगन्ज–गुलरिया सडक खण्डअन्तर्गत बाँकेको खजुरा गाउँपालिका–३ स्थित खजुरा बजार नजिकै पेडारी नालामा चार लेनको पक्की पुल निर्माण सम्पन्न भएको छ। पुल निर्माणसँगै यात्रुले वर्षौंदेखि भोग्दै आएको सास्ती अन्त्य भएको छ।
हुलाकी राजमार्ग निर्देशनालय, योजना कार्यालय नेपालगन्जका योजना प्रमुख लिलाबहादुर भण्डारीका अनुसार पेडारी नालामा पुल निर्माण कार्य निर्धारित समयमै सम्पन्न भएको हो। उनले आयोजनाको निरन्तर अनुगमन र निर्माण व्यवसायीको सक्रियताका कारण तोकिएको समयभन्दा अगावै काम सम्पन्न भएको जानकारी दिए।
पुल सञ्चालनमा आएसँगै सवारी साधनहरू नयाँ संरचनाबाट सञ्चालन भइरहेका छन्। यद्यपि पुलको दुवैतर्फ ५०–५० मिटर गरी कुल १०० मिटर सडक कालोपत्रे गर्ने काम अझै बाँकी रहेको छ, जुन केही दिनभित्रै सम्पन्न हुने सम्बन्धित निकायले जनाएको छ।
नारायणम निर्माण सेवासँग २०८३ वैशाख १८ गतेभित्र काम सम्पन्न गर्ने गरी भ्याटसहित आठ करोड ९६ लाख रुपैयाँमा ठेक्का सम्झौता गरिएको थियो। तर निर्माण कार्य तोकिएको समयभन्दा अघि नै सम्पन्न भएको देखिएको छ।
खजुरा गाउँपालिकाका अध्यक्ष डम्बर विकका अनुसार खजुरामा १,८०० मिटर सडक कालोपत्रे गर्ने काम आठ वर्षसम्म पनि पूरा हुन नसकेको अवस्थामा पेडारी नाला पुल भने निर्माण सुरु भएको छ महिनामै सम्पन्न हुनु उल्लेखनीय उपलब्धि हो।
यसअघि चार लेन सडक भए पनि पुरानो, साँघुरो र जीर्ण पुलका कारण सानो वर्षामा समेत नालाको पानी सडकमा बग्ने र वर्षायाममा पटक–पटक आवागमन प्रभावित हुने समस्या थियो। नयाँ पुल निर्माणसँगै उक्त समस्या समाधान भएको छ। निर्माण गरिएको पुल २२ मिटर चौडाइ र ३४.४ मिटर लम्बाइको रहेको छ।
Discussion about this post