बाँके चैत २१ गते ।
सशस्त्र प्रहरी बल, नेपाल नं. ३० गण हेडक्वाटर बागेश्वरी, बाँकेको १९औँ वार्षिकोत्सव शनिबार विविध कार्यक्रमका साथ सम्पन्न भएको छ।
कार्यक्रममा प्रमुख अतिथि नं. ५ विन्ध्यावासिनी बाहिनी मुख्यालय, रुपन्देहीका बाहिनीपति सशस्त्र प्रहरी नायब महानिरीक्षक दिपेन्द्र कुवँरले शान्ति सुरक्षा, सीमा सुरक्षा तथा विपद् व्यवस्थापनमा सशस्त्र प्रहरी बलले उच्च मनोबलका साथ निरन्तर जिम्मेवारी निर्वाह गर्दै आएको बताए। उनले सुरक्षा व्यवस्थालाई थप प्रभावकारी बनाउन आपसी समन्वय र पेशागत दक्षता अपरिहार्य रहेको उल्लेख गरे।
नेपालगन्ज उपमहानगरपालिकाका प्रमुख प्रशान्त विष्टले विपद्को समयमा सशस्त्र प्रहरी र स्थानीय तहबीचको सहकार्य प्रभावकारी रहेको धारणा व्यक्त गरे।
प्रमुख जिल्ला अधिकारी दिलकुमार तामाङले जिल्लाको शान्ति सुरक्षा कायम राख्न सशस्त्र प्रहरीको भूमिका महत्वपूर्ण रहेको उल्लेख गर्दै भने, “सीमा सुरक्षा, विपद् व्यवस्थापन र दैनिक शान्ति सुरक्षामा सशस्त्र प्रहरीको योगदान उल्लेखनीय छ। समन्वयलाई अझ सुदृढ गर्दै सेवा प्रवाहलाई प्रभावकारी बनाउन आवश्यक छ।”
प्रमुख अतिथि कुवँरले पानसमा बत्ती बालेर कार्यक्रमको उद्घाटन गरेका थिए। गणपति सशस्त्र प्रहरी उपरीक्षक भिम बहादुर चन्दको अध्यक्षतामा सम्पन्न कार्यक्रममा सहिद परिवारलाई सम्मान, कदरपत्र तथा पुरस्कार वितरण, प्रशंसापत्र प्रदान तथा सांस्कृतिक प्रस्तुति लगायतका कार्यक्रम गरिएको थियो। साथै, परेवा उडाएर शान्तिको सन्देश दिइनुका साथै केक काटिएको थियो।
कार्यक्रममा नेपाली सेना बज्रदल गण बाँकेका प्रमुख सेनानी रामचन्द्र श्रेष्ठ, जिल्ला प्रहरी कार्यालय बाँकेका प्रमुख प्रहरी उपरीक्षक अंगुर जिसी, राष्ट्रिय अनुसन्धान जिल्ला कार्यालय बाँकेका उप–अनुसन्धान निर्देशक हरिश विष्ट, नेपाल पत्रकार महासंघ बाँकेका अध्यक्ष नवीन गिरीलगायत विभिन्न सुरक्षा निकायका प्रमुख, सशस्त्र प्रहरीका अधिकारी तथा सहिद परिवारको उपस्थिति रहेको थियो।
समारोहको समापन गर्दै गणपति सशस्त्र प्रहरी उपरीक्षक भिम बहादुर चन्दले २०६३ साल चैत २१ गते स्थापना भएको यस गणले जिल्लाको शान्ति सुरक्षा कायम गर्न, सीमा क्षेत्रमा निगरानी बढाउन तथा विपद्का बेला उद्धार र राहतमा अग्रपंक्तिमा रही काम गर्दै आएको बताए। नेपालगन्ज उपमहानगरपालिका–१४ महेन्द्रनगरमा अवस्थित यस गण अन्तर्गत १६ वटा इकाइ सञ्चालनमा रहेको र यसले बाँके जिल्लाको सुरक्षा व्यवस्थालाई थप सुदृढ बनाइरहेको उनले जानकारी दिए।
Discussion about this post