बाँके मंसिर १७ गते ।
नेपालगन्ज उपमहानगरपालिकालाई आगामी तीन वर्षभित्र बालमैत्री स्थानीय शासन घोषणा गर्ने प्रतिबद्धता उपमहानगरपालिकाले गरेको छ । नेपालगन्ज उपमहानगरपालिकाका प्रमुख प्रशान्त विष्ट र उपप्रमुख कमरुद्दीन राईले उपमहानगरका सबै जनप्रतिनिधिहरूको उपस्थिति र सहमतिमा सो प्रतिबद्धता गरेका हुन् ।
उनीहरुले आगामी २०८३ साल असार समान्तभित्र नेपालगन्ज उपमहानगरपालिकालाई बालमैत्री स्थानीय शासन घोषणा गर्ने प्रतिबद्धता गरेका छन् । उपमहानगरपालिकाले नेपालगन्जमा जनप्रतिनिधिहरूका लागि आयोजना गरेको बालमैत्री स्थानीय शासन सम्बन्धी दुई दिने अभिमुखीकरण कार्यक्रममा प्रमुख विष्ट र उपप्रमुख राईले सो प्रतिबद्धता व्यक्त गर्नुहुँदै प्रतिबद्धता पत्रमा हस्ताक्षर समेत गरेका छन् ।
सो प्रतिबद्धता पत्रमा नेपालगन्जका सबै जनप्रतिनिधिहरूले हस्ताक्षर गरेर २०८३ साल असार मसान्तसम्म नेपालगन्जलाई बालमैत्री स्थानीय शासन पालिका घोषणा गर्ने सामूहिक प्रतिबद्धता गरे । सो अवसरमा बोल्दै प्रमुख विष्टले उपमहानगरलाई बालमैत्री पालिका घोषणा गर्न निकै चुनौतीपूर्ण रहेको भन्दै २०८३ सालसम्म जसरी पनि बालमैत्री शासन घोषणा गरेरै छाडिने बताए ।
उनले तोकिएको समयभन्दा अघि नै घोषणा गर्ने गरी काम गर्ने जनाउनुहुँदै त्यसका लागि सबै वडा कार्यालयहरूले पनि सोही बमोजिम गरिदिन हुन आग्रह गरेका छन् । सोही अवसरमा बोल्दै उपमहानगरका उपप्रमुख राईले नेपालगन्ज ठुलो सहर भएको र यहाँ धेरै होटल कलकारखाना भएकाले बालअधिकार स्थापित गर्न केही समस्या देखिएको जनाउँदै अब सबैले मिलेर मालमैत्री शासनका लागि चाहिने सूचकहरू पूरा गरेर यो काम गर्नु पर्नेमा जोड दिए ।
उनले उपमहानगरलाई बालमैत्री शासन घोषणा गर्ने प्रतिबद्धतालाई पूरा गर्न सबै नगरवासीको पनि सहयोग र समर्थनको खाँचो रहेको बताए । सो अभिमुखीकरणमा बालमैत्री स्थानीय शासन सम्बन्धी विभिन्न सूचक र त्यसलाई कार्यान्वयनका बारेमा जनप्रतिनिधिहरूलाई जानकारी गराइएको नेपालगन्ज उपमहानगरको महिला तथा बालबालिका महाशाखाका अधिकृत पवित्रा पुरीले बताए ।
कार्यक्रममा नेपालगन्ज उपमहानगरका प्रमुख, उपप्रमुख, वडा अध्यक्षहरू, कार्यपालिकाका सदस्यहरू, वडा सदस्यहरू, विभिन्न शाखाका प्रमुख लगायत कर्मचारीहरू, बाल क्लब र बालअधिकार समितिका पदाधिकारीहरू, विभिन्न सङ्घसंस्थाका प्रतिनिधि लगायतको सहभागिता रहेको थियो ।
Discussion about this post