बाँके चैत २५ गते ।
२२ वर्षीय सिर्जना बुढामगर चैत १४ गते राति करिव १२ वजे नेपालगन्ज उपमहानगरपालिका–१२, कोरियनपुरमा जलेको अवस्थामा फेला परिन् । जलेको अवस्थामा देखेपछि स्थानीयले प्रहरीलाई खबर गरे । प्रहरी टोलीले उनलाई उपचारका लागि तत्काल भेरी अस्पताल पु¥याएको थियो। तर, चिकित्सकले केहिबेरमै मृत घोषणा गरे ।
उक्त घटना अझैँ सेलाएको छैन । उक्त घटनाले सिर्जनका परिवारको साथै स्थानीय स्तब्ध छन् । पीडामा डुबेको परिवार न्यायको प्रतीक्षामा छ । अनुसन्धानमा खटिएको बाँके प्रहरीले घटनाको सत्यतथ्य पत्ता लगाउन गम्भिरताका साथ शुक्ष्म तरिकाले अनुसन्धान गरिरहेको जनाएको छ ।
‘घटनासँग सम्बन्धित महत्वपूर्ण सामग्रीहरू काठमाडौंस्थित प्रहरी विधि प्रयोगशालामा पठाइएको छ । मृतक सिर्जना र उनका प्रेमी आरिफ ढपालीको मोवाइल फोनलगायत सामग्रीको वैज्ञानिक परीक्षण भइरहेको छ,’ बाँके प्रहरी प्रवक्ता डिएसपी दीपक पातलीले भने, ‘हामी प्रमाण र तथ्यका आधारमा निष्पक्ष अनुसन्धान गरिरहेका छौँ । कुनै पनि दबाब वा प्रभावमा पर्ने प्रश्न नै उठ्दैन ।’
विधि प्रयोगशालाको रिपोट र अनुसन्धानपछि मात्र हत्या हो वा अन्य कारण हो भन्ने एकिन गर्न सकिने उनले बताए । ‘स्पष्ट निष्कर्षमा पुग्न सबै कोणबाट गहिरो अनुसन्धान भइरहेको छ । अहिले नै यो या त्यो भन्न सकिने अवस्था छैन,’ उनले भने, ‘प्रहरी कसैको दवाव र प्रभावमा नपरी शुक्ष्म तरिकाले अनुसन्धान गरी राखेको छ । प्रहरीको अनुसन्धानमा पीडित परिवारको साथ र सहयोगको खाँचो छ ।’
पीडित परिवारले न्याय नपाएसम्म शव नबुझ्ने अडान लिएपछि सिर्जनाको शव अझैँ भेरी अस्पतालमा राखिएको छ । सिर्जनामाथि योजनाबद्ध रूपमा पेट्रोल छर्किएर हत्या गरिएको आफन्तको दावी छ । ‘सिर्जनाको आत्महत्या नभई हत्या हो,’ सिर्जनाका एक आफन्तले भनिन्, ‘न्याय नपाएसम्म शव बुझ्ने कुरै आउँदैन ।’
घटनाले सिर्जनाको परिवार मात्र होइन, सिंगो समुदायलाई मर्माहत बनाएको छ । घटनाको निष्पक्ष छानबिन र दोषीमाथि कडा कारवाहीको माग स्थानीयले समेत गरेका छन् ।
चैत १४ गते राति करिब ११ः३५ बजे जलेको अवस्थामा फेला परेकी सिर्जनालाई उपचारका लागि तत्काल भेरी अस्पताल लगिएको थियो । तर, चैत १५ गते बिहान १ः२० बजे चिकित्सकले उनलाई मृत घोषणा गरेका थिए । पीडित परिवारले पेट्रोल छर्केर सिर्जनाको हत्या गरिएको दावी गरिरहेका बेला भेरी अस्पतालले पनि जलेर मृत्यु भएको पोस्टमार्टम रिपोर्ट दिएको छ ।
नेपालगन्ज उपमहानगरपालिका–८, रानीतलाउ नजिकै डेरा गरी बस्दै आएकी सिर्जनाको शव उनीसँग ‘लिभिङ टुगेदर’ मा बस्दै आएका नेपालगन्ज–१२, कोरियनपुरका आरिफ ढपालीको घर नजिकै फेला परेको थियो । मृतकका आफन्तले घटनामा आरिफको प्रत्यक्ष संलग्नता भएको आरोप लगाउँदै आएका छन् ।
घटना लगत्तै आरिफ फरार भएका थिए । उनलाई बाँके प्रहरीले अर्को दिन पक्राउ गरेको थियो । उनीसँगै उनका परिवारका सदस्यलाई समेत नियन्त्रणमा लिएर अनुसन्धान जारी राखेको बाँके प्रहरी प्रवक्ता समेत रहेका डिएसपी पातलीले बताए ।
घटनापछि फरार भएका अन्य दुई जनाको पनि खोजी भइरहेको उनले बताए । ‘घटनाका सबै पक्षलाई समेट्दै प्रहरीले घटनाको जरासम्म पुग्ने प्रयास जारी राखेको छ,’ डिएसपी पातलीले भने ।
उनले थप अनुसन्धान गर्न पक्राउ परेकाहरुको दुई पटक म्याद थप भइसकेको बताए । अनुसन्धान नसकिएकोले चैत २७ गते तेस्रो पटक म्याद थप गर्ने तयारी गरिएको उनले बताए । ‘अनुसन्धान पूरा भएपछि मात्रै विस्तृत तथ्य सार्वजनिक गर्ने पक्षमा छौँ,’ उनले भने, ‘दोषी जोसुकै भए पनि कानुनको कठघरामा उभ्याइनेछ । प्रहरीको अनुसन्धानमा शंका नगर्न बाँके प्रहरी सवै पक्षसँग आग्रह गर्दछ ।’
यो समाचार पनि पढ्नुहोस्
सिर्जना घटना छानबिन गर्न डिएसपी पातलीको नेतृत्वमा बन्यो ५ सदस्यीय समिति
Discussion about this post