काठमाडौं चैत २५ गते ।
संविधान संशोधनसम्बन्धी बहसपत्र तयार गर्ने कार्यदलको पहिलो बैठक आज बुधबार प्रधानमन्त्री तथा मन्त्रिपरिषद्को कार्यालयमा बस्ने भएको छ।
मन्त्रिपरिषद्को चैत १६ गतेको निर्णयअनुसार प्रधानमन्त्री वालेन्द्र शाह (बालेन) का प्रमुख राजनीतिक सल्लाहकार असिम शाहको संयोजकत्वमा गठन गरिएको ‘संविधान संशोधन बहसपत्र तयार गर्ने कार्यदल–२०८२’को पहिलो बैठक आज बस्न लागेको हो।
प्रधानमन्त्रीको सचिवालयका अनुसार बैठक दिउँसो ३ बजेका लागि तय गरिएको छ। कार्यदलमा विभिन्न राजनीतिक दलका प्रतिनिधिहरू सदस्यका रूपमा सहभागी छन्।
नेपाली कांग्रेसबाट मोहन आचार्य, नेकपा (एमाले) बाट संविधानसभा सदस्य डा. भीष्मनाथ अधिकारी, नेकपा (माओवादी केन्द्र) बाट संविधानसभा सदस्य तथा पूर्व कानुन मन्त्री देवप्रसाद गुरुङ, राष्ट्रिय प्रजातन्त्र पार्टीबाट संसदीय दलका नेता ज्ञानेन्द्र शाही र राष्ट्रिय जनमोर्चाबाट महासचिव मनोज भट्ट सदस्य रहेका छन्।
यसैबीच, नेपाली कांग्रेस, श्रम संस्कृति पार्टी, जनता समाजवादी पार्टी र लोकतान्त्रिक समाजवादी पार्टीले पठाउने प्रतिनिधिबारे आन्तरिक छलफल भइरहेको जनाइएको छ। ती दलहरूले आजै कार्यदलका सदस्यहरूको नाम टुंगो लगाउने अपेक्षा गरिएको छ।
कार्यदलमा प्रधानमन्त्री तथा मन्त्रिपरिषद्को कार्यालयका कानुन सचिव पुष्कर सापकोटा र नेपाल कानुन आयोगका सचिव इन्दिरा दाहाल पनि सदस्यका रूपमा रहेका छन्। कार्यदलको सदस्य–सचिवका रूपमा कानुन तथा फैसला कार्यान्वयन महाशाखाका प्रमुख लिलाधर सुवेदी रहेका छन्।
Discussion about this post