बाँके बैशाख १९ गते ।
नेपालगन्ज उपमहानगरपालिकामा सर्वसाधारणलाई तातो हावा (लु) बाट जोगाउन घरघरमा स्वयंसेवक खटाइको छ । उपमहानगरपालिका वडा नम्बर २१ र २२ मा तातो हावाको उच्च जोखिम रहेको देखिएकोले घरघरमा पुगेर सचेतना फैलाउन स्वयंसेवक खटाइएको रेडक्रस सोसाइटी बाँकेले जनाएको छ।
रेडक्रस सोसाइटी बाँकेका अध्यक्ष गोवर्द्धन सिंह सम्झनाका अनुसार टिनको छाना भएको घर, दीर्घ स्वास्थ्य समस्या भएका बिरामी, गर्भवती, सुत्केरी, बालबालिका, ज्येष्ठ नागरिक, अपाङ्गता भएकालगायत अत्यधिक गर्मी र लुबाट बच्ने उपाय सिकाउन स्वयंसेवक खटाइएको जानकारी दिए। अमेरिकन रेडक्रस, नेपालगन्ज उपमहानगरपालिका र नेपाल रेडक्रस सोसाइटी बाँके शाखाको संयुक्त साझेदारीमा नेपालगन्ज उपमहानगरपालिका क्षेत्रमा तातो हावाको लहर प्रतिकार्य कार्यक्रम सञ्चालन भइरहेको छ। तातो हावाहुरी तथा अत्यधिक गर्मीले गर्दा मजदुरी गरेर जीविकोपार्जन गर्नेहरूको दिनचर्या प्रभावित बनेको छ । दिउँसोमा खेतीपाती गर्न सकिने अवस्था छैन भने लामो समयदेखिको खडेरीका कारण किसानहरू मारमा परेको नेपालगन्ज १४ परस्पुरका अंकु वर्माको भनाइ छ । गर्मीका कारण सडक सुनसान छन् ।
किसानहरूलाई तरकारी लगायतका अन्नबाली हुर्काउन मुस्किल परेको छ भने सिँचाइको अभावमा किसानले लगायतको तरकारी बालीलाई समेत जोगाउन हम्मेहम्मे परेको छ । लामो समयदेखि खडेरी परेसँगै बाँकेको विभिन्न ठाउँमा आगलागीका घटना समेत बढेका छन् । लामो समयदेखि पानी नपरेपछि वायुमण्डल दूषित भई मानिसमा विभिन्न खालका समस्याहरू देखिएर बिरामीहरू अस्पतालमा आउने गरेका छन् ।
नेपालगन्जका अस्पतालहरुमा गर्मी बढेसँगै रुघा, खोकी, ज्वरो, झाडा पखाला लगायत विभिन्न समस्या लिएर बिरामीहरू आउने गरेको चिकित्सकहरु बताउँछन् । अस्पतालहरूमा अहिले बिरामीको अत्यधिक चाप बढेको छ । तातो हावा तथा तातो लहरले गर्दा अधिक थकाई लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, चक्कर लाग्ने, बेहोस हुने जस्ता समस्याहरू देखिएको हुँदा सजक रहन चिकित्सकले आग्रह गरेका छन् ।
बिहान राखिएको हरियो ताजा साग, तरकारी तथा फलफूल साँझ पर्न नपाउँदै सुकेर खान समेत नमिल्ने गरी बिग्रने गरेको व्यवसायीको भनाइ छ । गर्मी बढेसँगै चिसो पेय पदार्थको बिक्री भने बढेको छ । चोक चोकमा राखिएका जुस कर्नर तथा पसलहरूमा भिडभाड लाग्ने गरेको छ । चिकित्सहरु भने अत्यधिक गर्मी र तातो हावा चलेको समय बाहिर ननिस्कन आग्रह गरेका छन् भने झोलिलो पदार्थको प्रयोग गर्न आग्रह गरेका छन् ।
Discussion about this post