बाँके बैशाख २० गते ।
देशको पहिलो र ठूलो कारागार बाँकेमा संचालनमा आएको छ । बैजनाथ गाउँपालिका ३ नौवस्तास्थित रहेको क्षेत्रीय कारागारमा निर्मित प्रशासनिक भवनको उपप्रधान तथा गृहमन्त्री रवि लामिछानेले उद्घाटन गरेपछि कारागार संचालनमा आएको हो ।
एक हजार कैदीबन्दी अट्ने क्षमता भएको उक्त कारागारमा पहिलो चरणमा एक सय ३० जनालाई राखिएको छ । जिल्ला कारागार बाँकेबाट एक सय ३० जना कैदीबन्दीलाई यहाँ स्थानान्तरण गरिएको छ ।
कारागार उद्घाटन गर्दै गृहमन्त्री लामिछानेले कारागारलाई यातना गृहको रुपमा बनाउन नहुने बताए । पहिलो चरणमा बी ब्लकमा कैदीबन्दी राखिएको छ । चार वटा ब्लक मध्ये वी ब्लकमा दुई सय ५२ कैदीबन्दीलाई राख्ने योजना भएपनि पहिलो चरणमा एक सय ३० जनालाई राखिएको छ ।
ए ब्लकमा यसअघि नै बाल विज्याई गरेको अभियोग लागेका बालबालिका राखिएको छ । ३ अर्ब रुपैयाँमा निर्माण भएको क्षेत्रीय कारागार एक सय ३४ विघामा फैलिएको छ । अहिले निर्माण भएको कारागार भवनमा २४ सय पुरुष र ६ सय महिला कैदी अट्ने क्षमता छ ।
उद्घाटन कार्यक्रममा गृहमन्त्री रवि लामिछानेले कैदीबन्दीलाई संविधान प्रदत्त अधिकारबाट बञ्चित नगरिने बताए ।
क्षेत्रीय कारागारको सुरक्षाको प्रमुख जिम्मेवारी सशस्त्र प्रहरी बलले लिएको छ । यहाँ सशस्त्र प्रहरी र नेपाल प्रहरीका लागि छुट्टाछुट्टै ब्लक बनाएर भौतिक संरचना निर्माण भएको छ ।
प्रत्येक युनिटको माथिल्लो तल्लामा बहुउद्देश्यीय सभा हल निर्माण गरिएको छ नेपाल प्रहरी र सशस्त्र प्रहरीको छुट्टाछुट्टै ब्यारेकसँगै प्रशासनिक भवन लगायतका संरचना पनि निर्माण भएका छन् । तेस्रो चरणमा १५ बेडको अस्पताल, माध्यमिक विद्यालय लगायतका संरचना निर्माण गर्ने लक्ष्य रहेको छ ।
पाँच सयबढी कैदीबन्दी भएको कारागारमा अनिवार्य रुपमा १५ बेडको अस्पताल सञ्चालनमा ल्याउनुपर्ने प्रावधान नयाँ कारागार ऐनमा छ । कैद मिनाह हुने विगतको पद्धतीलाई रोक्न ऐन, कानुन ल्याउन लागेको बताउँदै गृहमन्त्री लामिछानेले पावर र पहुँचको भरमा कैद मिनाह गर्ने प्रबृत्ती अन्त्य गरिने बताए । क्षेत्रीय कारागारमा कैदीबन्दीलाई सीपमूलक तालिम दिन हलको व्यवस्था गरिएको छ ।
कारागारको नियम उल्लंघन गर्नेलाई कष्टकर सजाय दिन अलग्गै दुई वटा अध्याँरा साँघुरा कोठा पनि बनाइएको छ । कारागारलाई सुधार केन्द्रका रुपमा विकास गर्ने उद्देश्यसहित आवश्यक संरचना निर्माण गरिएको गृहमन्त्री रवि लामिछानेको भनाई छ ।
लुम्विनी प्रदेशका सामाजिक विकास मन्त्री रत्न खत्रीले संचालनमा आएको कारागारमा रहेका मान्कैदीबन्दीलाई अपराधिक मनोविज्ञानबाट सत्कर्ममा लाग्ने प्रेरणा दिने विश्वास ब्यक्त गरे । उनले कारागारले सकारात्मक सोँचको विकास गर्ने थलोको रुपमा विकास गरिनुपर्ने धारणा राखे ।
Discussion about this post