बाँके असार १० गते ।
बुधबार राति आएको हावाहुरीका कारण घरका छाना उडेर, पर्खाल भत्किएर क्षति भएका बाँकेको कोहलपुर नगरपालिका –१५ का ७५ घर परिवारलाई त्रिपाल वितरण गरिएको छ ।
गत बुधबार आएको भीषण हावाहुरीका कारण कोहलपुर नगरपालिकाको वडा १५ मात्र ७५ घरमध्ये केहीका छाना उडेका थिए । केहीका पर्खाल भत्किएर घर ढलेका थिए । हावाहुरीबाट क्षति भएर खुला आकाशमुनि बस्न बाध्य पीडित वडावासीलाई ८२ हजार ५०० रुपियाँ बराबरको त्रिपाल वितरण गरिएको वडा १५ का वडा अध्यक्ष दीपेन्द्रकुमार चौधरीले बताए । उनले भत्किएका र छाना उडेका घरमा त्रिपाल तानेर बसोबास गर्न सहज होस् भन्ने उद्देश्यका साथ त्रिपाल वितरण गरिएको बताए ।
असार ५ गते राति आएको हावाहुरीका कारण कोहलपुरमा मात्र १०० बढी घर भत्किएको, एउटा उद्योगको पर्खाल भत्किएर एक जना महिलाको मृत्यु भएको छ । नौ जना घाइते भएको कोहलपुर नगरपालिकाको प्रहरी प्रमुख वीरबहादुर थापाले जानकारी दिए ।थापाका अनुसार कोहलपुर १४ मा सबैभन्दा बढी क्षति भएको छ भने कोहलपुर १५ र १० मा क्षति भएको छ ।
घरको छाना उडेका वा पर्खाल भत्किएका पीडितलाई खाद्यान्न तथा अन्य भाँडाकुडालगायतका सामग्री आवश्यक परेको हुँदा जिल्लामा रहेका विभिन्न संघ संस्था तथा व्यक्तिलाई सहयोग गर्न अपिल गरिएको कोहलपुर नगरपालिकाले जनाएको छ ।
Discussion about this post