बाँके असोज २० गते ।
बडा दशैंको सुरुवातसँगै नेपालगन्ज सहर दुर्गा मूर्तिले झकिझकाउ भएको छ । सहरका चोक–चोक तथा गल्ली–गल्लीमा स्थापना गरिएका दुर्गा मूर्तिमा प्रत्येक दिन बिहानैदेखि रातिसम्म पूजाआजा गर्ने गरिन्छ । भजनकीर्तनले नेपालगन्ज गुल्जार बनेको छ । रातभर भजन बजाइन्छ ।
घटस्थापनाको दिन चोक–चोक र गल्ली–गल्लीमा दुर्गा मूर्ति स्थापना गरिएका हुन् । एउटै टोलमा दुई–तीन वटा मूर्ति स्थापना गरिएको छ । दशैंको बेला दुर्गा भगवतीको मूर्ति सजाएर पूजा गर्ने प्रचलन बढेको छ । दुर्गा मूर्तिमा घटस्थापनाका दिनदेखि राति अबेरसम्म जाग्राम बसेर देवी दुर्गा भगवतीको पूजा आराधना गर्ने गरिएको छ । घटस्थापनाको दिन स्थापना गरिएका दुर्गा मूर्तिको आँखामा पट्टी बाँध्ने चलन छ । सप्तमीका दिन मात्र पट्टी खोल्ने गरिन्छ ।
महिषासुरलाई सप्तमीको दिन दुर्गा भवानीले मारेको कारण दिन मूर्तिको आँखा सोही दिन खोल्ने परम्परा छ । घटस्थापनाको दिन सजाइएका मूर्ति विजयादशमीको भोलिपल्ट अर्थात् एकादशीका दिन राप्ती नदीमा लगेर विसर्जन गर्ने गरिन्छ । बाँकेका गल्ली, चोक, चौराह र मन्दिरमा पाँच सयको हाराहारीमा दुर्गामूर्ति स्थापना गरिएको अनुमान छ ।
घटस्थापना सुरु हुनुअघि नेपालगन्जमा मूर्तिकारलाई भ्याइनभ्याई हुने गरेको छ । सहरमा मूर्तिको माग बढ्दै गएकाले सीमित मूर्तिकारलाई भ्याइनभ्याई हुने गरेको छ । पहिले पहिले भारतबाट मूर्ति ल्याइन्थ्यो भने पछिल्लो समय यहीँ नै मूर्ति बनाइन्छ । तर, मूर्तिका लागि चाहिने सामान भने भारतबाटै ल्याउनुपर्ने बाध्यता छ ।
Discussion about this post