बाँके चैत २० गते ।
बाँकेको डुडुवा गाउँपालिकाले टेपरीस्थित डुडुवा नालामा ट्रस पुल निर्माण कार्य सुरु गरेको छ। गाउँपालिका–१, टेपरीमा रहेको उक्त नालामा स्थानीय आवत–जावत सहज बनाउन पुल निर्माणको पहल गरिएको हो।
गाउँपालिका अध्यक्ष नरेन्द्रकुमार चौधरीले एक कार्यक्रमबीच योजनाको शिलान्यास गर्दै पुल निर्माणपछि नालापारीका बासिन्दालाई वर्षा, बाढी तथा अन्य समयमा सुरक्षित र सहज रूपमा आवत–जावत गर्न सकिने विश्वास व्यक्त गरे।
अध्यक्ष चौधरीले सीमित साधन स्रोतका बाबजुद हालका लागि यस पुलले स्थानीयलाई राहत दिने उल्लेख गर्दै भविष्यमा थप ठूला पूर्वाधार निर्माणका लागि पहल गरिने प्रतिबद्धता जनाए।
गाउँपालिकाका इन्जिनियर सुरेन्द्र बर्माका अनुसार एक करोड ११ लाख रुपैयाँको लागतमा ५७ मिटर लामो उक्त ट्रस पुल निर्माणको जिम्मा लुम्बिनी इन्जिनियरिङ बक्स प्रालिले लिएको छ। निर्माण कार्य दुई महिनाभित्र सम्पन्न गर्ने लक्ष्य राखिएको छ।
पुल निर्माणपछि डुडुवा नालापारीका चौफेरी, कृषि चौफेरी, छिटाइपुर्वा, पाझा, टेपरी, पिप्रहवा लगायतका गाउँका स्थानीयलाई प्रत्यक्ष लाभ पुग्ने अपेक्षा गरिएको छ।
यसैगरी, बाढी प्रभावित तथा विकासमा पछि परेको डुडुवा वडा नम्बर १ लाई गाउँपालिकाले विशेष प्राथमिकतामा राख्दै कृषि तथा धार्मिक पर्यटन क्षेत्रको रूपमा विकास गर्न गुरुयोजना कार्यान्वयन गरिरहेको अध्यक्ष चौधरीले जानकारी दिए।
Discussion about this post