बाँके भदौ २ गते ।
बाँकेमा फरार अपराधि, लागु औषध विक्रेता, ओसार पसारकर्ता र गैरकानुनी कार्यमा लागेकाहरु धमाधम पक्राउ पर्न थालेपछि भागाभाग भएको छ । एसपी रामप्रसाद घर्तीमगरले बाँके प्रहरी प्रमुखको जिम्मेवारी सम्हालेदेखि कडा रुपमा प्रस्तुत भएपछि गैरकानुनी कार्य गर्नेहरुको भागाभाग भएको हो । एसपी घर्तीमगरले बाँके प्रहरीको कमाण्ड सम्हालेपछि १३ वर्षदेखि फरार अपराधिसमेत पक्राउ परेका छन् ।
बाँके प्रहरीले २०६८ सालमा बाँके जिल्ला अदालतले सर्वस्वसहित जन्म कैद फैसला गरेको फरार अपराधि साविक नौवस्ता गाउँ विकास समिति ६ का ६३ वर्षीय आशाराम थारुलाई आइतवार पक्राउ गरेको छ । थारुले साविक नौवस्ता गाविस ४ का गणेश बादीको ३० असार, २०६१ मा कर्तब्य ज्यान गरि फरार भएका थिए । कर्तब्य ज्यान मुद्दामा बाँके जिल्ला अदालतले २१ पुस, २०६८ मा सर्वस्वसहित जन्म कैद फैसला गरेको बाँके प्रहरीले जनाएको छ ।
थारु भारतमा लुकिछिपी बस्दै आएका थिए । घरमा आएको सूचनाको आधारमा उनलाई १ भदौँ, ०८२ मा पक्राउ गरिएको बाँकेका प्रहरी प्रवक्ता दीपक पातलीले जानकारी दिए । ‘गणेश बादीको हत्या गरेदेखि थारु फरार थिए । प्रहरीको निगरानीमा रहेका थारु घरमा आएको सूचना पाउने वित्तिकै पक्राउ गरि कारवाहीका लागि अदालतमा बुझाएका छौँ,’ उनले भने ।
लागु औषधको जालो तोड्दै बाँके प्रहरी
बाँके प्रहरीले लागु औषधको जालो तोड्दै गएको छ । बाँके प्रहरी प्रमुख एसपी रामप्रसाद घर्ती मगरको कडा निर्देशनपछि मातहतका प्रहरी कार्यालयले लागु औषधसहित कारोवारी र ओसार पसारमा संलग्नलाई धमाधम पक्राउ गरि लागु औषधको जालो तोड्न थालेका हुन् ।
३१ साउनमा बाँके प्रहरीले पेस्तोलसहित दुई जनालाई पक्राउ गरेपछि एसपी घर्तीमगरको कार्य प्रति सर्वत्र प्रशंसा भएको छ । एसपी सापको कडा निर्देशन र चुस्त कार्यशैलीले नेपालगन्ज उपमहानगरपालिका ९ का १७ वर्षीय समिर धपाली र सोही ठाउँका १६ वर्षीय राजन सोनकरलाई कटुवा पेस्तोल र त्यसमा लाग्ने दुई राउण्ड गोलीसहित पक्राउ गर्न सफल भएका छौँ,’ डिएसपी पातलीले भने । अस्थायी प्रहरी पोष्ट बसपार्कका इन्चार्ज विष्णु शाही नेतृत्व टोलीले खानतलासी गर्दा उनीहरुको साथबाट कटुवा पेस्तोल र त्यसमा लाग्ने गोली फेला परेको उनले बताए ।
३१ साउनमा अस्थायी प्रहरी पोष्ट नगर भवनमा कार्यरत सहायक प्रहरी निरीक्षक सुनिल शाहीको टोलीले दुई दिनमा एक सय ४७ ग्राम ९ सय मिलिग्राम ब्राउनसुगर बरामद गरेको थियो । बुधवार दिउँसो ४७ ग्राम ब्राउनसुगर सहित एक जनालाई पक्राउ गरेका शाहीले शुक्रवार १०१ ग्राम ९ सय मिलिग्राम ब्राउनसुगर सहित एक जनालाई पक्राउ गरेका थिए ।
प्रहरीले शुक्रवार भारी परिमाणको लागु औषध ब्राउनसुगर सहित एक जनालाई पक्राउ गरेको थियो । प्रहरी सहायक निरीक्षक शाहीसहित वडा प्रहरी कार्यालय नेपालगन्जका प्रहरी बरिष्ठ नायव निरीक्षक अमरबहादुर रावत, लागु औषध नियन्त्रण ब्यूरो नेपालगन्ज र लागु औषध नियन्त्रण ब्यूरो सुर्खेतको संयुक्त टोलीले ब्राउनसुगर विक्रेता नेपालगन्ज उपमहानगरपालिका ११ त्रिभुवन चोकबाट विपी चोकका ४४ वर्षीय रसुल अहमद कवडियालाई पक्राउ गरेको थियो । सहायक निरीक्षक शाहीको टोलीले बिहीवार साँझ तुलसीपुर उपमहानगरपालिका–५ पुलचोकका २७ बर्षीय बिराज बिकलाई ४७ ग्राम ब्राउन सुगरसहित पक्राउ गरेको थियो । उनलाई नेपालगन्ज उपमहानगरपालिका ३ एकलैलीस्थित मुसाफिर खाना नजिकबाट पक्राउ गरिएको बाँके प्रहरी प्रवक्ता डिएसपी पातलीले जानकारी दिए ।
त्यसैगरी, बाँके प्रहरीले शुक्रवार दिउँसो नेपालगन्ज बसपार्कको पछाडीबाट १६१ ग्राम खैरो हेरोइनसहित चार जनालाई नियन्त्रणमा लिन सफल भएको थियो ।
यसैवीच, लागु औषध ब्यूरो नेपालगन्जका सहायक प्रहरी निरीक्षक नविन शाहीमाथि लागुऔषध कारोबारीले आक्रमण गरि भाग्ने क्रममा प्रहरीले उनीमाथि गोली प्रहार गरेको थियो । प्रहरीको गोली लागेर लागु औषध कारोबारी भारत रुपइडिहाका कार्तिक कुम्हार घाइते भएका थिए ।
बाँके प्रहरीले बुधवार राती नेपालगन्ज उपमहानगरपालिका १४ उधौपुर्वाबाट २२ लाख तीन हजार ९१५ रुपैयाँ र १५ ग्राम ५ सय मिलिग्राम ब्राउनसुगर सहित सोही ठाउँका रमेश लोनियालाई पक्राउ गरेको थियो ।
Discussion about this post