बाँके, असोज २३ गते ।
बाँकेको डुडुवा गाउँपालिकाबाट ३२ किलो ५२० ग्राम गाँजासहित एक जना पक्राउ परेका छन्।
डुडुवा गाउँपालिका–१ पिपरहवाका ४० वर्षीय रामनरेश कुर्मीलाई प्रहरीले गाँजासहित पक्राउ गरेको हो।
प्रहरी चौकी खडैचाका इन्चार्ज प्रहरी सहायक निरीक्षक कुलबहादुर विकको नेतृत्वमा खटिएको टोलीले गस्तीका क्रममा बिहीबार कुर्मीले चलाएको साइकल जाँच गरेको थियो। साइकलको पछाडि स्याउला र घाँसभित्र लुकाएर राखिएको अवस्थामा १० किलो २२० ग्राम गाँजा बरामद भएको जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतित सिंह राठौरले बताए।
त्यसपछि प्रहरीले कुर्मीको घर, कोठा र खेतबारीमा खानतलासी गरेको थियो। सो क्रममा खेतमा थुप्रो पारेर राखिएको थप २२ किलो ३०० ग्राम गाँजा बरामद भएको राठौरले बताए।
उनका अनुसार प्रहरीले कुल ३२ किलो ५२० ग्राम गाँजासहित एक थान किप्याड मोबाइल र एक थान साइकल बरामद गरेको छ।
पक्राउ परेका कुर्मीविरुद्ध लागूऔषधसम्बन्धी कसुरमा बाँके जिल्ला अदालतबाट सात दिनको म्याद थप गरी अनुसन्धान भइरहेको राठौरले जानकारी दिए।
पछिल्लो समय बाँके प्रहरीले लागूऔषध ओसारपसार तथा कारोबार नियन्त्रणका लागि निगरानी र कारबाही तीव्र बनाउँदै आएको छ।
Discussion about this post