बाँके भदौ १६ गते ।
पछिल्लो समय बाँकेमा तस्करी मौलाएको छ । तस्करी रोक्न नाकामा परिचालन भएका सशस्त्र प्रहरीका मुख्य जिम्मेवार समेत कमाउ धन्दामा लागेपछि बाँकेमा तस्करी मौलाएको सर्वसाधारणको बुझाई छ । दिउँसोको समयमा कडाई गरेको जस्तो देखाएर नाकामा रहेका सशस्त्र प्रहरीका बोर्डर आउट पोष्ट (विओपी) का इन्चार्जहरुको मिलोमतोमा तस्करले रातको समयमा अवैध सामान भित्र्याउने गरेको रहस्य खुलेको छ ।
तस्करले रातको समयमा भारी परिमाणमा अवैध सामान भित्र्याउँदै गरेको दृश्य देख्दासमेत विओपी इन्चार्जको निर्देशनमा ड्यूटीमा खटिएका सशस्त्र प्रहरीहरु आँखा चिम्लिने गरेको स्वयम तस्करहरुले अनलाइन खोजखवरलाई बताउने गरेका छन् । दिउँसोको समयमा सवैले देख्ने भएकोले विओपी इन्चार्जहरुले तस्करलाई रातको समयमा सामान ओसार्न सुझाव दिने गरेको खुलासा भएको छ । ‘सशस्त्र प्रहरीले लाइन दिएपछि हामीले रातको समयमा सामान ओसार्छौँ,’ एक तस्करले भने, ‘सशस्त्रले लाइन नदिँदासम्म अवैध रुपमा भारतबाट सामान ल्याउने कुनै सम्भावना रहदैन ।’
विओपी इन्चार्जको समयावधि सकिनै लागेकोले पनि उनीहरु कमाउ धन्दामा लागेको श्रोतले जनाएको छ । इन्चार्जको जिम्मेवारी पाएको केहि महिना कडाई गर्ने विओपी इन्चार्जहरुले समयावधि सकिन लागेपछि जानेबेला कमाउ धन्दामा लाग्ने गरेको बुझिएको छ । श्रोत भन्छ, ‘अधिकांंश विओपी इन्चार्जको समयावधि सकिन लागेको छ । त्यसैले उनीहरु कमाउ धन्दामा लागेका छन् । स्वयम विओपी इन्चार्जहरु कमाउ धन्दामा लागेपछि तस्करी बढ्ने नै भयो ।’
सशस्त्र प्रहरी लुम्विनी प्रदेशले सूचना संकलनका लागि विवादित प्रहरी सहायक निरीक्षक सोमराज शर्मालाई परिचालन गरेपछि तस्करी झनै मौलाएको छ । सशस्त्र प्रहरी बल गण नं. ३० हेडक्र्वाटर बागेश्वरीका तत्कालिन गणपति एसपी विमल डाँगीको पालामा परिचालन भएका घुमुवाकै कारण सशस्त्र प्रहरी बलले डाँगीलाई कारवाही स्वरुप २२ दिन हेडक्वार्टर तानेको थियो । ‘सोमराज शर्मा घुमुवाको रुपमा परिचालन भएपछि बाँकेमा तस्करी मौलाएको छ,’ एक तस्करले भने, ‘उहाँ (शर्मा) आएदेखि हामीलाई काम गर्न सहज भएको छ ।’
शर्माले तस्कर र तस्करीलाई सहयोग गरेको सूचना दिँदा समेत सशस्त्र प्रहरी बल गण नं. ३० हेडक्र्वाटर बागेश्वरीका गणपति एसपी शोभाकान्त खनालले उनको बचाउ गर्दै आएका छन् । तस्करीलाई शून्यमा झार्ने प्रतिवद्धता जनाएका एसपी खनालले तस्करलाई सघाउने शर्माको बचाउ गर्न थालेका छन् ।
उनले शर्मालाई राम्रो र इमान्दार भएको भन्दै बचाउ गर्नुले उनी पनि कमाउ धन्दामा लागेको आशंका गरिएको छ । ‘एसपी सावले शर्मा जीको बचाउ गर्नु भनेको कमाउ धन्दामा लागेको प्रष्ट बुझ्न सकिन्छ,’ एक प्रत्यक्षदर्शीले अनलाइन खोजखवरसँग भने, ‘पहिले पहिले एसपी सावले नराम्रो ब्यक्तिको बचाउ गर्नु हुन्न जस्तो लाग्थ्यो, तर पछिल्लो समय उहाँ पनि अवैध सामान ल्याउन सहयोग गर्ने कर्मचारीको बचाउमा लाग्नु भएको छ ।’
Discussion about this post