बाँके भदौ ३० गते ।
बाँके जिल्लाका दुई वटा बाल सुधारगृह र एउटा कारागारबाट भागेका ३४० जना बालबन्दी र कैदीहरूमध्ये २८५ जना अझै पक्राउ परेका छैनन् । भागेका मध्ये हालसम्म ५७ जना मात्रै पक्राउ परेको कारागार र बाल सुधारगृहले जनाएका छन् ।
जिल्लाको बैजनाथ गाउँपालिकास्थित नौबस्ता बाल सुधारगृह र डुडुवाको जयन्दु बाल सुधारगृहबाट भागेका १९३ जना बालबन्दीमध्ये ४० जना पक्राउ परेको तथा नौबस्ता क्षेत्रीय कारागारबाट भागेका १४७ जना कैदीमध्ये १७ जना पक्राउ परेको जनाइएको हो ।
डुडुवास्थित जयन्दु बालसुधार गृहका प्रमुख किशोर शर्माले सुधारगृहमा रहेका २२८ जना बालबन्दीमध्ये ११५ जना भागेकोमा २३ जना पक्राउ परेको र ९२ जनाको खोजी भइरहेको बताए ।
फरार रहेकाहरूलाई विभिन्न स्थानबाट पक्राउ गरिएको र केही आफै फर्किएको प्रमुख शर्माले बताए । सोही प्रकारले नौबस्ता बाल सुधारगृहका प्रमुख श्यामबहादुर रानाले सुधारगृहमा रहेका १७६ जना बालबन्दी मध्ये प्रहरीसँगको झडपमा पाँच जनाको मृत्यु भएको र ७८ जना भागेको बताए । भागेका मध्ये हालसम्म १७ जना मात्र पक्राउ परेको उनले बताए । सो सुधारगृहका ६१ जना बालबन्दीको खोजी कार्य भइरहेको छ ।
यसैगरी नौबस्ताकै क्षेत्रीय कारागारबाट फरार भएका १४७ जना कैदी मध्ये १७ जना पक्राउ परेको तथा १३० जनाको खोजी भइरहेको सो कारागारका प्रमुख जालन्धर भुषालले बताए । उक्त कारागारमा ५८५ जना कैदीहरू रहेका थिए । अझै पनि फरार रहेको २८५ जना बालबन्दी र कैदीहरूको खोजी कार्य भइरहेको तथा ती मध्ये धेरै जना सीमापारी पुगेको अनुमान पनि गरिएको जिल्ला प्रहरी कार्यालय बाँकेले जनाएको छ ।
जेनजी आन्दोलनको समयमा बाँके लगायत देशभरिकै विभिन्न बाल सुधारगृह र कारागारबाट कैदीबन्दीहरू भागेका थिए । तर, नेपालगन्जस्थित कारागारबाट कैदीहरूले भाग्ने प्रयास गरे पनि सेनाको घेराबन्दीका कारण भाग्न सफल भएका थिएनन् । सो क्रममा सेनाले गोली चलाउँदा कैलाली निवासी एक जना कैदीको खुट्टामा गोली समेत लागेको थियो ।
Discussion about this post