बाँके मंसिर १ गते ।
बाँकेका स्पा–मसाज सेन्टरमा प्रहरीले निगरानी बढाएको छ । विशेषगरी नेपालगन्ज र कोहलपुर क्षेत्रमा संचालित स्पा, मसाज सेन्टर र खाजा घरमा गैरकानुनी गतिविधि बढ्दै गएको जनगुनासोपछि जिल्ला प्रहरी कार्यालय बाँकेले कडाइका साथ अनुगमन थालेको हो ।
यही अभियानअन्तर्गत शनिबार गरिएको संयुक्त अनुगमनमा प्रहरीले अबैध तथा गैर–व्यवसायिक क्रियाकलापमा संलग्न १८ जनालाई नियन्त्रणमा लिएको छ । तीमध्ये ११ जना महिला तथा ७ जना पुरुष रहेका छन् ।
यस अनुगमन टोलीको नेतृत्व जिल्ला प्रहरी कार्यालय बाँके तथा वडा प्रहरी कार्यालय नेपालगन्जका इन्चार्ज प्रहरी निरीक्षक शेखर खड्काले गरेका थिए । सूचना अधिकारी एवम् प्रवक्ता प्रहरी नायव उपरीक्षक दिपक पातलीका अनुसार पक्राउ परेकाहरूमाथि थप अनुसन्धान भइरहेको छ ।
बाँके प्रहरी प्रमुखमा एसपी अंगुर जिसीले जिल्ला प्रहरी कार्यालयको कमाण्ड सम्हालेपछि जिल्लामा कानून वर्जित कार्य गर्नेमाथि कठोर अभियान सुरु भएको छ। केही दिनअघि मात्र प्रहरीले नेपालगन्जका चार होटलमा छापा मारेर बेश्यावृत्तिमा संलग्न ४५ जनालाई नियन्त्रणमा लिएको थियो । त्यसैको निरन्तरता स्वरुप नेपालगन्ज र कोहलपुरका स्पा र खाजा घरमा प्रहरीले कारवाही अभियान चलाएको प्रवक्ता पातलीले बताए ।
एसपी जिसीले प्रमुखको जिम्मेवारी सम्हालेपछि तस्कर तथा अवैध कारोबारमा संलग्न समूह ‘त्रसित भएको’ बताइन्छ । उनको निर्देशनमा प्रहरी टोलीले ठूलो परिमाणमा भन्सार छलीका सामान समेत बरामद गरिसकेको छ । खुला सीमा, तस्करी र मासु–वस्तु तथा दैनिक उपभोग्य सामग्रीको अवैध ढुवानीले दीर्घकालदेखि चुनौती बनेको बाँकेमा जिसीको सक्रियतापछि नयाँ आशाका रूपमा देखिएको छ ।
Discussion about this post