बाँके मंसिर ९ गते ।
बाँके प्रहरी प्रमुख एसपी अंगुर जिसी भन्सार छलीका सामान नियन्त्रण अभियानमा छन् । भन्सार छलेर ल्याइएका कैयौं अवैध सामान नेपालगन्जबाट बरामद भइरहेको पनि छ ।
उनले सिमा नाकामा भएका मातहतका प्रहरी कार्यालयलाई अवैध सामान नियन्त्रण गर्न कडा निर्देशन समेत दिएका छन् ।
अवैध रुपमा सामान भित्रिएको फेला पर्ने वित्तिकै कारवाही गर्ने उर्दी जारी गरि कमी कमजोरी गर्नेलाई सजाय समेत दिँदै आएका छन् । उनको निर्देशनपछि केहि प्रहरी कार्यालयले अवैध सामान नियन्त्रणमा कडाई गरेका छन् ।
फलस्वरुप उक्त नाकाबाट अवैध सामान ओसार पसारमा कमी आएको छ, तर साईगाउँ सिमा नाकामा रहेका प्रहरी चौकीले तस्करलाई सघाएपछि तस्करहरु निर्वाध रुपमा सामान ओसार्न ओसारी रहेका छन् ।
फितलो प्रहरी प्रशासन र खुला सीमा नाकाको फाइदा उठाउँदै तस्करहरुले उक्त नाकाबाट अवैध तस्करीलाई तीब्र पारेका छन् । पछिल्लो समय साईगाउँ नाका हुँदै तस्करी बढेको प्रत्यक्षदर्शी बताउँछन् ।
सशस्त्र प्रहरी बिओपी बढैया, प्रहरी चौकी साईगाउँ र प्रहरी चौकी बेलभारको मिलोमतोमा तस्करले साईगाउँ क्षेत्रबाट निर्वाध रुपमा अवैध समान ओसार पसार गरेको प्रत्यक्षदर्शीको भनाई छ ।
राजस्व चुहावट नियन्त्रणका लागि खटिएका सशस्त्र प्रहरी र नेपाल प्रहरीको मिलोमतोमा त्यस क्षेत्रमा तस्करी मौलाएको स्थानीयको भनाई छ । अवैध तस्करी नियन्त्रणसँगै अपराधका बारेमा सूचना लिन परिचालन भएका जिल्ला प्रहरीको घुमुवा टोली आउने सूचना पाउने वित्तिकै प्रहरी चौकी साईगाउँ र प्रहरी चौकी बेलभारका प्रहरीले तस्करलाई सूचना दिने गरेको एक तस्करले नाम उल्लेख नगर्ने शर्तमा अनलाइन खोजखवरलाई जानकारी दिए । ‘जिल्ला प्रहरीको घुमुवा आउने सूचना पाउने वित्तिकै प्रहरी चौकीका केही प्रहरीहरुले आज सामान नल्याउन भनेर सूचना दिने गरेकाछन्,’ ति तस्करले भने ।
तस्करी नियन्त्रणका लागि सीमा नाकामा खटिएका सुरक्षाकर्मीहरु तस्करसँग मोटो रकम लिएर सघाएपछि राज्यको करोडौँ राजस्व गुमिरहेको सीमा क्षेत्रका बासिन्दाको भनाई छ । ‘प्रहरी चौकीका इन्चार्जहरु नै तस्करसँग मिलेपछि कसैको केहि लाग्दैन,’ तस्करले भने, ‘जिल्लाको घुमुवा आउने सूचना पाउने वित्तिकै हामी पनि सजग हुन्छौँ । आज हुने काम भोली गर्छौँ ।’
भारतबाट ल्याउने सामानलाई चेकजाँच गरेर मात्रै नेपाल भित्रिन दिने व्यवस्था छ, तर साईगाउँ सीमा नाकाबाट दैनिक लाखौँका अवैध सामान नेपाल भित्रिरहेको प्रत्यक्ष देख्न सकिन्छ ।
तस्करहरुले कपडा, हार्डवेर, टायल, खाद्यवस्तु (चिनी, चामल, दाल), सुर्तीजन्य पदार्थ, तरकारी, ब्रोइलर कुखुरा, नेपालमा प्रतिवन्धित मंगुर माछा भित्र्याइरहेको स्थानीयले बताए । भारतबाट अवैध रुपमा ल्याएको सामान तस्करहरुले साईँगाउँमा भण्डारण गरि दिउँसो र रातीको समयमा नेपालगन्ज ल्याउने गर्दछन् । ‘सशस्त्र प्रहरीको बढैया विओपी र नेपाल प्रहरीलाई लाइन दिएर तस्करहरुले रातारात भारतबाट अवैध सामान भित्र्याउँछन्,’ एकजना स्थानीयले नाम उल्लेख नगर्ने शर्तमा भने, ‘तस्करहरुले साईँगाउँ नाकाबाट दैनिक ५० लाखभन्दा बढीको सामान भित्र्याएको अनुमान छ ।
नाकामा खटिएका सुरक्षाकर्मीहरु तस्करीको सामान देखेर पनि नदेखे झैँ गर्छन् । प्रहरीको कार्यशैली देखेर हामी अचम्मित भएका छौँ ।’ स्थानीयका अनुसार तस्कर र घुमुवा प्रहरी छुट्टाउन गाह्रो हुने गरेको छ । तस्करहरुले रातिको ११ बजेदेखि विहानको ५ बजेसम्म सामान भित्र्याउने गरेको साईँगाउँ सीमा क्षेत्रका स्थानीयको आरोप छ । सशस्त्रका बिओपी इन्चार्ज र प्रहरी चौकीका इन्चार्जलाई महिनावारी र तल्लो दर्जालाई सामानको अवस्था तथा मूल्य हेरेर पाँच सयदेखि एक हजार रुपैयाँसम्म लाइन दिने गरेको स्वयम तस्करहरुको भनाई छ ।
तस्करहरुले रातीको समयमा ठुलो परिमाणमा भन्सार छली गरेर साईँगाउँमा भण्डारण गर्ने र पछि एकमुष्ट नेपालगन्ज ल्याउने गरेको खुलासा भएको छ । ‘साईगाउँमा भण्डारण गरेको समान रातीको समयमा अटो रिक्सा, मोटरसाइकल र साइकलमा नेपालगन्ज ल्याउँछौँ,’ एक तस्करले अनलाइन खोजखवरसँग भने, ‘नेपाल प्रहरी र सशस्त्र प्रहरीले लाइन लिएपछि अरुले रोक्ने कुरै भएन । निर्धक्कसँग सामान ल्याउँछौँ ।’
सशस्त्र प्रहरी र नेपाल प्रहरीले नेपालगन्जस्थित जमुनाह नाकामा कडाई गरेपछि अन्य सहायक नाकाबाट सामान भित्र्याउन सहयोग गरिरहेको खुल्नमा आएको छ । ‘नेपालगन्ज नाकामा कडाई गरिएपछि तस्करहरु सहायक नाकाबाट तस्करी गर्न थालेका छन्,’ एक प्रत्यक्षदर्शीले भने ।
जसका कारण तस्कर र सुरक्षाकर्मीलाई फाइदा भएको छ । तस्करहरुले साईँगाउँ प्रहरी चौकीलाई मासिक लाखौँ रुपैयाँ महिनावारी बुझाउने गरेका छन् ।
बाँकेका प्रहरी प्रमुख एसपी अंगुर जिसीले तस्करलाई सहयोग नगर्न र तस्करसँग रकम लिएको पाइए कडा कारवाही गर्ने मातहतका प्रहरीलाई निर्देशन समेत दिएका छन् । उनले मातहतका प्रहरीलाई घुस नखान र खानेलाई कारवाहीको दायरामा ल्याउन निर्देशन दिए पनि त्यसको कार्यान्वयन हुन सकेको छैन । ‘एसपी सावले निर्देशन कार्यान्वयन भए नभएको सुक्ष्म तरिकाले निरीक्षण गर्न जरुरी छ,’ एक प्रहरी अधिकृतले भने, ‘एसपी सावले घुस नखान र खानेलाई कारवाहीको दायरामा ल्याउन निर्देशन दिएर चोरी निकासीलाई शुन्यमा झार्ने प्रतिवद्धता जनाउनु भएको छ । यो राम्रो हो ।’
नेपाल–भारत सीमा अन्तरगत बाँकेको साईगाउँ, नरैनापुर, खडैचा, हिरमिनिया कालाबन्जार, भज्जुपुरुवा, नयाँ वस्ती, बढैया, सैनिक लगायतका सहायक नाका चोरी तस्करीका लागि प्रमुख सहायक नाका मानिन्छन् ।
Discussion about this post