बाँके मंसिर २८ गते ।
डुडुवा गाउँपालिका ५ कम्दीस्थित हजरत बाबा कम्मर शाह बाबा मजारमा लागेको मेलामा चोरीका घटना भए पनि प्रहरीले बेवास्ता गरेको पीडितले गुनासो लगाएका छन् ।
मेलाको सुरक्षार्थ खटिएका नेपाल प्रहरीको टोलीलाई चुनौति दिँदै चोरहरुले दर्जनौ ब्यक्तिको सामान र पैँसा चोरी भएको मनिषा चौधरीले गुनासो गरिन् । उनले आफ्नो मोवाइल चोरी भएको र दर्जनौ ब्यक्तिको सामान र पैसा चोरी हुँदासमेत मेला सुरक्षार्थ खटिएका प्रहरीले खोजतलासमा ध्यान नदिएको बताइन् ।
‘मेरो मोवाइल चोरी भएको प्रहरीलाई जानकारी गराएँ, तर ड्यूटीमा खटिएका प्रहरीले कुनै चासो दिएनन्,’ उनले भनिन् ।
मेलामा हरेक दिन चोरी भए पनि प्रहरीले चोर पक्रन नसकेको स्थानीय भोला यादवले बताए । उनले रातदिन प्रहरीले ड्यूटी दिए पनि सर्वसाधारणको मालसामान र पैँसा चोरी नरोकिएको बताए ।
कमर शाह बाबा मेला हेर्न गएकी नेपालगन्जकी एक महिलाको आठ हजार रुपैयाँ चोरी भएको छ । आफ्नो रुपैयाँ हराएको जानकारी दिँदा समेत प्रहरीले वास्ता नगरेको ति महिलाले गुनासो गरिन् । उनले भनिन्, ‘चोरी भएको पैँसा खोजिदिन प्रहरीसँग आग्रह गरेँ, तर मेरो आग्रहलाई प्रहरीले सुनुवाई गरेन,’ उनले भनिन् ।
मेला व्यवस्थापन समिति र प्रहरीले चोरी भएको घट्नामा चासो नंदिँदा दैनिक चोरीका घट्ना भएको स्थानीय गोमती बुढाथोकीले बताइन् । उनको पनि मोबाईल चोरी भएको छ । २५ मंसिरमा मेला हेर्न गएकी थिइन् । ‘मोवाइल चोरी हुने वित्तिकै प्रहरीलाई खवर गरेँ, प्रहरीले खोजतलास गरेको भए पाइन्थ्यो की ?, प्रहरीले बेवास्ता गर्दा मोवाइल गुमाउन पर्यो,’ उनले भनिन् ।
२७ मंसिरमा मिलन चोकका कृष्णा गुरूङको पनि मोबाइल चोरी भएको थियो । ‘यसपालीको मेलामा धेरै जसो मोवाइल चोरी भएको छ,’ उनले भने ।
२५ मंसिरमा मेला हेर्न गएका एक जना भारतीय नम्बरको मोटरसाइकलसमेत पार्किङ स्थलबाट चोरी भएको थियो ।
यही मंसिर २३, २४, २५, २६ र २७ गते मेला संचालन भएको थियो । मेला हेर्न भारतबाट समेत दर्शालु आएका थिए ।
Discussion about this post