बाँके पुस २७ गते ।
डुडुवा गाउँपालिका ४ की नाबालिक माथि भएको जबरजस्ती करणी कसूरको बारेमा विभिन्न मिडियामा आएको समाचारमा कुनै सत्यता नभएको बाँके प्रहरीले स्पष्ट पारेको छ । ‘पीडित बालिकाको तर्फबाट दिइएको घटना सम्बन्धि जाहेरी दरखास्त जिल्ला प्रहरी कार्यालय बाँकेले लिन नमानेको, पीडितलाई न्यायिक प्रक्रियामा असहयोग गरेको आशयसहित पीडित पक्षले मंसिर २५ गते काठ्माडौँस्थित रिपोटर्स क्लवमा गरेको पत्रकार सम्मेलन प्रति बाँके प्रहरीको गम्भिर ध्यानाकर्षण भएको छ,’ बाँके प्रहरी प्रवक्ता डिएसपी दीपक पातलीद्वारा जारी विज्ञप्तिमा उल्लेख छ ।
पीडित भनिएकी बालिका मंसिर १७ गते बाँके प्रहरीको सम्पर्कमा आउने वित्तिकै सोही दिन बिस्तृत स्वास्थ्य परीक्षण लगायतको प्रारम्भिक अनुसन्धान कार्य गरिएको प्रहरीले दावी गरेको छ । ‘पीडित बालिकालाई लिएर आउने सहजकर्ता मार्फत तत्काल जाहेरी दरखास्त ल्याउन आग्रह गरेका थियौँ । हामी सल्लाह गरी आउँछौं भनी फिर्ता भएपछि सम्पर्कमा नआई मंसिर २२ गते पीडित बालिकाको आमाको नामबाट हुलाक मार्फत यस कार्यालयमा जाहेरी दरखास्त प्राप्त भएको हो,’ विज्ञप्तिमा भनिएको छ ।
हुलाकबाट प्राप्त जाहेरी सनाखत पश्चात मात्र दर्ता गर्नुपर्ने मुलुकी फौजदारी कार्यविधी संहिता २०७४ को परिच्छेद २ को दफा ४ को (३ क) मा ब्यवस्था भएको हुँदा सोही अनुसार जाहेरवालालाई सम्पर्क गर्दा सम्पर्क हुन नसकेको विज्ञप्तिमार्फत प्रहरीले स्पष्ट पारेको छ । ‘पीडित ब्यक्तिको घर ठेगानामा प्रहरी गई सम्पर्क गर्न खोज्दा समेत घर ठेगानामा नभेटिएको हुँदा जाहेरवालालाई यस कार्यालयको सम्पर्कमा ल्याईदिन निजका आफन्त, सम्बन्धित संस्था र छिमेकीहरुलाई समेत पटक–पटक अनुरोध गरेकोमा जाहेरवाला हालसम्म यस कार्यालयको सम्पर्कमा नआएको हुँदा जाहेरी दर्ता हुन नसकेको ब्यहोरा सम्बन्धित सरोकारवाला सम्पूर्णमा जानकारी गराउँदछौं,’ डिएसपी पातलीले आइतवार जारी गरेको विज्ञप्तिमा भनिएको छ ।
नाबालिक माथि भएको जबरजस्ती करणी जस्तो गम्भिर प्रकृतीको मुद्दामा यस कार्यालयले चासो नदिएको, अनुसन्धान नगरेको, जाहेरी दरखास्त नलिएको, बिभिन्न दवाब र प्रभावमा परेको, पीडितलाई बेवास्ता गरेको भन्ने कुराको प्रहरीले खण्डन गरेको छ ।
विज्ञप्तिमा अगाडी भनिएको छ, ‘यस्ता गम्भिर घटनालाई यस कार्यालयले अत्यन्त संवेदनशिल भई घटनाको गहन ढंगले अनुसन्धान गरिरहेको र निरन्तर गरिनै रहेने प्रतिवद्धता जाहेर गर्दै पीडित पक्षलाई प्रहरीको अनुसन्धानमा विश्वास गरी कुनै दवाब प्रभावमा नपरी यस कार्यालयको सम्पर्कमा आई जाहेरी दरखास्त सनाखत गरी अनुसन्धान कार्यमा सहयोग गर्नहुन यसै विज्ञप्ती मार्फत अपिल गर्दछौं ।’
नेपाल प्रहरी सदैव नागरिकको सेवामा समर्पित रही, पीडितलाई न्याय दिलाई, पिडकलाई कानूनी दायरामा ल्याई कानूनी राज्यको प्रत्याभुति दिलाउँदै आएको प्रहरीले जनाएको छ ।
पीडितको सुरक्षा, न्यायिक पहुँचमा सहजिकरण, दवाब रहित निष्पक्ष एवं बस्तुनिष्ठ अनुसन्धान गर्ने कार्यमा यस कार्यालय पूर्ण प्रतिवद्ध रहेको ब्यहोरा निवेदन गर्न चाहान्छौं,’ बाँके प्रहरीले भनेको छ, ‘उक्त घटनाको अनुसन्धान कार्यलाई प्रभावित गर्ने मनशाय राखी केही ब्यक्ती/समुह तथा संचार माध्यमले ब्यक्तिगत स्वार्थपूर्ति गर्ने कुण्ठित मनाशयका साथ पीडितलाई दवाब र प्रभावमा पारी अनर्गल प्रचारप्रसार गरी, पीडितलाई झन् पीडित बनाउने कार्य गर्दै आएको हुँदा यस्ता गम्भिर प्रकृतिको घटनालाई संवेदनशिल र जिम्मेवार भई अनुसन्धान कार्यमा सहजिकरण गरिदिनहुन समेत सरोकारवाला सम्बन्धित सबैमा हार्दिक अनुरोध गर्दछौं ।’
Discussion about this post