बाँके माघ १९ गते ।
बाँके जिल्लाका तीनवटै निर्वाचन क्षेत्रमा निर्वाचन आचारसंहिता पालना गराउन कडाइका साथ निगरानी सुरु गरिएको छ।
निर्वाचन आयोगद्वारा गठन गरिएको निर्वाचन आचारसंहिता अनुगमन समितिले जिल्लामा आचारसंहिता प्रभावकारी रूपमा कार्यान्वयन गराउन अनुगमन तीव्र बनाइएको जनाएको छ। समितिका अनुसार निर्वाचन क्षेत्र नम्बर २ र ३ मा आचारसंहिताविपरीत गतिविधि गरिएको भन्दै मौखिक उजुरीहरू प्राप्त भएका छन्।
बाँकेका सहायक प्रमुख जिल्ला अधिकारी तथा आचारसंहिता अनुगमन समितिका अधिकृत पूर्णबहादुर खत्रीले उम्मेदवारले विद्यालय परिसरमा कार्यक्रम गरेको, पालिकाका वडाध्यक्षले सरकारी संरचना प्रयोग गरी प्रचारप्रसार गरेको तथा पालिकाको डोजर र टिपर प्रयोग गरी सडक ग्राभेल गरिएकोलगायतका उजुरी आएको जानकारी दिए।
उनले प्राप्त सबै उजुरीलाई गम्भीरतापूर्वक लिइएको उल्लेख गर्दै निर्वाचन आचारसंहिताविपरीत कुनै पनि गतिविधि गर्न नपाइने स्पष्ट पारे। साथै, सम्बन्धित पक्षलाई यस विषयमा कडाइका साथ सचेत गराइएको पनि उनले बताए।
“हामी स्थलगत अनुगमन पनि गर्नेछौं। हालसम्म प्राप्त सूचना र जानकारीका आधारमा अनुगमनको काम सुरु गरिएको हो। आगामी दिनमा निगरानी अझ कडा बनाइनेछ,” खत्रीले भने।
प्रतिनिधिसभा सदस्य निर्वाचनलाई स्वतन्त्र, निष्पक्ष र भयमुक्त वातावरणमा सम्पन्न गराउने उद्देश्यले अनुगमन समितिले जिल्लाका तीनै निर्वाचन क्षेत्रमा निगरानीलाई थप तीव्र बनाउने जनाएको छ।
निर्वाचन आयोगले अनुगमन कार्यका लागि बाँकेका सहायक प्रमुख जिल्ला अधिकारी पूर्णबहादुर खत्री र कोष तथा लेखा नियन्त्रण कार्यालयका प्रमुख सर्वोदय उपाध्यायलाई अनुगमन अधिकृतको जिम्मेवारी दिएको छ।
अनुगमन समितिका अनुसार निर्वाचन प्रचारप्रसार कार्य आगामी फागुन ४ गतेदेखि १८ गतेसम्म मात्र गर्न पाइने कानुनी व्यवस्था रहेको छ। यद्यपि, निर्वाचन आयोगद्वारा जारी गरिएको निर्वाचन आचारसंहिता भने गत माघ ४ गतेदेखि नै लागू भइसकेको आयोगले जनाएको छ।
Discussion about this post