बाँके फागुन २९ गते ।
बाँकेको जानकी गाउँपालिका अन्तर्गत भिखारीपुर्वा–पार्वतीपुर क्षेत्रस्थित नहरमा कत्था उद्योगबाट निस्कने फोहोर पानी विसर्जन गरिएको भन्दै स्थानीय बासिन्दाले जनस्वास्थ्य र वातावरणमा गम्भीर असर परेको गुनासो गरेका छन्।
स्थानीयका अनुसार उद्योगबाट निस्किएको प्रशोधन नगरिएको कालो तथा दुर्गन्धित पानी नहरमा मिसाइएपछि त्यस क्षेत्रका बासिन्दा प्रभावित भएका छन्। फोहोर पानीका कारण मानव स्वास्थ्यसँगै पशुचौपाया र कृषि बालीमा समेत नकारात्मक असर परेको स्थानीयको भनाइ छ।
जानकी गाउँपालिका–५ का स्थानीय शिया यादवले राँझा नहरबाट बनिया गाउँ हुँदै इलाका प्रहरी कार्यालय खजुराखुर्द नजिकको नालासम्म बग्ने पानी अत्यन्त प्रदूषित बनेको बताए। उनका अनुसार नहरको पानी कालो र दुर्गन्धित भएपछि स्थानीयको दैनिकी कष्टकर बनेको छ। उनले उक्त पानीका कारण पशुपन्छी बिरामी पर्न थालेको र सिँचाइमा प्रयोग गर्दा अन्नबालीमा समेत असर देखिएको बताए।
जानकी गाउँपालिका वडा नं. ५ का वडा अध्यक्ष तथा प्रवक्ता टिकानाथ यादवले घटनालाई गम्भीर रूपमा लिइएको बताएका छन्। उनले जनस्वास्थ्यमा असर पर्ने गरी उद्योगबाट भएको यस्तो कार्य तत्काल नियन्त्रण गर्न सम्बन्धित निकायको ध्यानाकर्षण गराइने बताए।
गाउँपालिका अध्यक्ष छब्बन खाँले पनि जनस्वास्थ्य र वातावरणसँग जोडिएको विषय भएकाले यसप्रति गाउँपालिका गम्भीर रहेको प्रतिक्रिया दिएका छन्। उनले घटनाको सत्यतथ्य छानबिन गरी दोषी पाइए कानुनबमोजिम कारबाही प्रक्रिया अघि बढाइने प्रतिबद्धता व्यक्त गरे।
यस्तै, प्रमुख प्रशासकीय अधिकृत परशुराम उपाध्यायले स्थानीयबाट प्राप्त गुनासोका आधारमा अनुगमन टोली गठन गरी वास्तविक अवस्था बुझ्ने तयारी भइरहेको जानकारी दिए। वातावरणीय मापदण्डविपरीत कार्य भएको पाइएमा सम्बन्धित उद्योगलाई नियमन तथा कारबाहीको दायरामा ल्याइने उनले बताए।
उता, स्थानीय बासिन्दाले भने दुर्गन्धका कारण बस्तीमा बस्नसमेत कठिन भएको भन्दै तत्काल प्रभावकारी अनुगमन गरी प्रदूषण रोक्न माग गरेका छन्।
Discussion about this post