बाँके चैत २४ गते।
सरकारको निर्णयअनुसार सोमबारदेखि लागू हुने गरी बाँके जिल्लाका अधिकांश सरकारी कार्यालय बिहान ९ बजेदेखि सञ्चालन हुन थालेका छन्।
जिल्ला प्रशासन कार्यालय बाँकेका अनुसार विभिन्न सरकारी कार्यालयमा बिहान ८ः४५ बजेसम्म अधिकांश कर्मचारी उपस्थित भएका र कार्यालयहरू खुलिरहेको पाइएको छ।
प्रमुख जिल्ला अधिकारी दिलकुमार तामाङका अनुसार जिल्लाका अधिकांश सरकारी कार्यालय समयमै खुलेका छन् र कर्मचारी पनि निर्धारित समयमा उपस्थित भएका छन्। उनले बिहानको समयमा सेवाग्राहीको संख्या अपेक्षाकृत कम रहेको जानकारी दिए। उनका अनुसार सोमबार बिहान ९ बजे सेवाग्राहीको संख्या कम रहे पनि मङ्गलबारदेखि यो संख्या बढ्दै गएको छ।
उनले सरकारी कार्यालयहरूको अनुगमन निरन्तर जारी रहने उल्लेख गर्दै समयमा नखुल्ने वा समयमा उपस्थित नहुने कर्मचारीमाथि कारबाही गरिने चेतावनी दिए। साथै, सेवाग्राहीलाई कुनै समस्या वा गुनासो नआउने गरी सेवा प्रवाह गर्न कर्मचारीलाई निर्देशन दिइएको उनले बताए।
भूमिसुधार तथा मालपोत कार्यालय बाँकेका प्रमुख सविन सिंह चौधरीले पनि पहिलो दिन सबै कर्मचारी समयमै उपस्थित भए पनि बिहान सेवाग्राहीको संख्या कम रहेको र मङ्गलबारदेखि बढेको जानकारी दिए।
यसैबीच, स्थानीय तहका कार्यालयहरू पनि बिहान ९ बजेदेखि सञ्चालनमा आएका छन् र अधिकांश कर्मचारी समयमै उपस्थित देखिएका छन्।
Discussion about this post