बाँके चैत २३ गते।
नेपालगञ्ज–गुलरिया सडक खण्डअन्तर्गत खजुरा र जानकी गाउँपालिकाको सीमास्थित किरण नालामा थप पुल निर्माण कार्य सुरु गरिएको छ।
चार लेनमा विस्तार गरिएको सडकमा पुरानो पुल भने दुई लेनको मात्र रहेकाले सवारी आवागमनमा समस्या देखिँदै आएको थियो। सोही समस्यालाई समाधान गर्न नयाँ पुल निर्माण अघि बढाइएको हुलाकी राजमार्ग निर्देशनालय योजना कार्यालय, नेपालगञ्जले जनाएको छ।
योजना प्रमुख लिलाबहादुर भण्डारीका अनुसार उक्त क्षेत्रमा सवारी दुर्घटनाका घटना बढ्दै गएपछि पुल विस्तारको आवश्यकता देखिएको हो। “दुईवटा पुल सञ्चालनमा आएपछि चार लेन सडकमा सवारी आवागमन सहज हुने विश्वास लिएका छौँ,” उनले बताए।
करिब चार करोड ५० लाख रुपैयाँको लागतमा निर्माण सुरु गरिएको पुलको हाल जग निर्माण कार्य तीव्र गतिमा भइरहेको छ। केही वर्षअघि निर्माण गरिएको दुई लेनको पुल साँघुरो भएपछि सोही स्थानमा थप दुई लेनको नयाँ पुल निर्माण गर्न लागिएको हो।
पुरानो पुललाई यथावत राख्दै नयाँ पुल थपिनेछ। आगामी असारभित्र निर्माण कार्य सम्पन्न गर्ने लक्ष्यसहित काम भइरहेको योजना कार्यालयले जनाएको छ।
यसैगरी, बर्दियाको बढैयाताल गाउँपालिकाअन्तर्गत चपला नालामा रहेको पुललाई पनि चार लेनको बनाउने योजना रहेको कार्यालयले जानकारी दिएको छ।
Discussion about this post