केपी शर्मा ओली १३ दिनपछि जिम्मा जमानीमा रिहा

काठमाडौं चैत २६ गते ।
पक्राउ परेको १३औँ दिनमा प्रहरीले पूर्वप्रधानमन्त्री केपी शर्मा ओलीलाई जिम्मा जमानीमा रिहा गरेको छ।

त्रिभुवन विश्वविद्यालय शिक्षण अस्पतालमा उपचाररत रहेका ओलीलाई उनकी धर्मपत्नी राधिका शाक्यको जिम्मा लगाइएको जिल्ला प्रहरी परिसर काठमाडौंका एसपी पवन भट्टराईले जानकारी दिए। उनका अनुसार, अनुसन्धानका क्रममा आवश्यक पर्दा उपस्थित हुने सर्तमा उनलाई जिम्मा जमानीमा छाडिएको हो।

भदौ २३ र २४ गतेको घटनाको छानबिनका लागि गठित गौरीबहादुर कार्की नेतृत्वको आयोगले फौजदारी मुद्दामा अनुसन्धान गर्न सिफारिस गरेपछि प्रहरीले उनलाई चैत १४ गते पक्राउ गरेको थियो।

प्रहरी हिरासतबाट मुक्त भए पनि ओली अस्पतालबाट कहिले डिस्चार्ज हुने भन्ने विषयमा चिकित्सकहरूले निर्णय गर्ने जनाइएको छ।