बाँके वैशाख २ गते ।
बाँके जिल्लामा खोपको मात्रा पूरा नगर्ने बालबालिकाको सङ्ख्या ८ सय रहेको पाइएको छ। जिल्ला स्वास्थ्य कार्यालयका अनुसार गत आर्थिक वर्षको तुलनामा यस्तो सङ्ख्या घट्दो क्रममा रहेको छ।
जिल्ला स्वास्थ्य कार्यालयका वरिष्ठ जनस्वास्थ्य अधिकृत गोकर्ण गिरीका अनुसार खोपको मात्रा पूरा नगर्ने बालबालिकामध्ये सबैभन्दा बढी मुस्लिम समुदायका रहेका छन्। उनका अनुसार उक्त समुदायका ३५४ जना बालबालिकाले खोपको मात्रा पूरा गरेका छैनन्।
त्यस्तै, मधेसी समुदायका १८९ जना, दलित समुदायका १२८ जना, जनजाति समुदायका ५७ जना तथा अन्य समुदायका बाँकी बालबालिकाले खोपको मात्रा पूरा नगरेको तथ्यांक छ। खोप नलगाएका बालबालिकाको सङ्ख्या अझै उल्लेख्य रहेकाले वैशाख महिनाभर खोजी अभियान सञ्चालन गरिने तयारी गरिएको गिरीले बताए।
१६ महिनादेखि ५९ महिनासम्म उमेर समूहका खोप छुटेका बालबालिकालाई लक्षित गर्दै खोजपड्ताल अभियान सञ्चालन गरिने जनाइएको छ। “नियमित खोप लगाउन छुटेका बालबालिकालाई वैशाख महिनाभर खोजेर खोप लगाउनेछौँ,” गिरीले भने।
सरकारले वैशाख महिनालाई खोप महिना तथा सचेतना प्रवर्द्धन महिनाका रूपमा मनाउँदै आएको छ।
जिल्ला स्वास्थ्य कार्यालय बाँकेकी प्रमुख सुनिता पौडेलले वैशाखको दोस्रो सातालाई ‘खोप सप्ताह’का रूपमा मनाइने जानकारी दिइन्। नियमित खोप कार्यक्रम प्रभावकारी रूपमा सञ्चालन हुँदा बाल मृत्युदर घट्दै गएको उल्लेख गर्दै उनले राष्ट्रिय खोप कार्यक्रमअन्तर्गत १५ महिनाभन्दा कम उमेरका बालबालिकालाई १३ प्रकारका खोप, गर्भवती महिलालाई आवश्यक खोप तथा किशोरीहरूलाई पाठेघरको मुखको क्यान्सरविरुद्धको ह्युमन प्यापिलोमा भाइरस (एचपीभी) खोप प्रदान गरिँदै आएको बताइन्।
Discussion about this post