बाँके वैशाख २१ गते ।
सवारी साधनलाई व्यवस्थित गर्न नसक्दा नेपालगन्जको मुख्य प्रवेशद्वार मानिने बसपार्क क्षेत्र अस्तव्यस्त बनेको छ । बसपार्क क्षेत्रमा खटिएका ट्राफिक प्रहरीले व्यवस्थित गर्न नसक्दा सवारी साधन सडक ढाकिने गरि पार्किङ हुने गरेका हुन् ।
सवारी साधन व्यवस्थित नहुँदा बसपार्क आसपास क्षेत्रको जनजीवन प्रभावित भइरहेको स्थानीय बताउँछन् । सवारी साधन व्यवस्थित गर्न नसक्दा बसपार्क क्षेत्रको सडक साँघुरिएको मात्र होइन, सर्वसाधारणलाई हिड्डुल गर्नसमेत कठिन भइरहेको स्थानीयले गुनासो गरेका छन् । ‘अव्यवस्थित पार्किङका कारण स्थानीय व्यवसायी सबैभन्दा बढी मारमा परेका छौँ,’ एक व्यवसायीले भने ।
मोटरसाइकल, ई–रिक्सा र अन्य सवारी साधन पसल अगाडि नै जथाभावी पार्किङ गरिदा ग्राहकलाई पसलसम्म पुग्न कठिन हुने गरेको उनीहरूको गुनासो छ । पसल खोलेर व्यवसाय गर्नुपर्ने हो, तर दिनभरि गाडी हटाउनमै समय जान्छ । ग्राहक पसल अगाडि पुग्न नसकेर फर्किने अवस्था छ,’ एक स्थानीय व्यवसायीले भने ।
व्यवसायीहरूका अनुसार बसपार्क क्षेत्रमा ट्राफिक व्यवस्थापन प्रभावकारी हुन नसक्दा व्यापारमा प्रत्यक्ष असर परेको छ भने दुर्घटनाको जोखिम पनि उत्तिकै बढेको छ । यस क्षेत्रमा अस्थायी ट्राफिक प्रहरी पोष्टसमेत रहेको छ । बसपार्क क्षेत्र हेर्ने गरि अस्थायी प्रहरी पोष्ट पनि नजिकै छ, तर ट्राफिक प्रहरी अस्थायी प्रहरी पोष्टका प्रहरी अव्यवस्थित रुपमा पार्किङ गरेको देखेर पनि नदेखेझैँ गरेको स्थानीयको गुनासो छ । ‘प्रहरी पोष्ट त छ, प्रहरी पनि छन्, तर व्यवस्थापन किन हुँदैन ?,’ एक स्थानीयले भने ।
बसपार्क क्षेत्रमा रहेका यातायात व्यवसायी र व्यापारीसँग ट्राफिक प्रहरी र अस्थायी प्रहरी पोष्टका प्रहरीसँग मिलेको आरोप स्थानीयले लगाएका छन् । प्रहरीहरु केही स्थानीय व्यवसायीसँग मिलेर मासिक रुपमा रकम उठाउने गरेको खुलासा भएको छ । एक स्थानीयले नाम नखुलाउने सर्तमा भने, ‘जसले मासिक बुझाउँछ, उसले जहाँ मन लाग्यो त्यहीँ गाडी राख्न पाउँछ । नियम सबैका लागि बराबर छैन भन्ने अनुभूति हुन्छ ।’
प्रहरीको भूमिकाले बसपार्क क्षेत्रमा केहि न केहि समस्या छ भन्ने पुष्टि गरेको छ । नेपालगन्ज बसपार्क लामो समयदेखि अव्यवस्थित पार्किङ, अनियन्त्रित सार्वजनिक सवारी साधन र कमजोर अनुगमनको समस्यासँग जुध्दै आएको क्षेत्र हो । अस्थायी समाधानले समस्या झन जटिल बन्दै गएको स्थानीयको भनाइ छ ।
ट्राफिकको जिल्ला नेतृत्वले कडा निर्देशन दिएपनि मातहतको निकायले भने असुली धन्दा नछाडेको स्थानीयले आरोप लगाउँदै आएका छन् । ‘बसपार्क क्षेत्रमा ट्राफिक प्रहरी, यातायात व्यवसायी र व्यापारी वीच पैँसाको चलखेल भइरहन्छ,’ एक स्थानीय व्यापारीले भने ।
Discussion about this post