बाँके, भदौ १८ गते ।
भारतबाट अवैध रूपमा कुखुरा भित्र्याउने क्रम बढेको भन्दै बाँकेको जानकी गाउँपालिका–१ पचपोखरा क्षेत्रका स्थानीयले सीमामा खटिएका सुरक्षाकर्मीको भूमिकामाथि गम्भीर प्रश्न उठाएका छन्।
नाकामा सुरक्षाकर्मीको बाक्लो उपस्थिति हुँदाहुँदै भारतबाट नियमित रूपमा कुखुरा भित्रिने गरेको भन्दै स्थानीयले यस्तो ओसारपसार सुरक्षाकर्मीको जानकारी वा मिलेमतोबिना सम्भव नहुने आरोप लगाएका छन्।
यसैबीच जिल्ला प्रहरी कार्यालय बाँकेले बुधबार पचपोखरा क्षेत्रबाट भारतबाट अवैध रूपमा ल्याइएका १८ वटा बोइलर कुखुरा नियन्त्रणमा लिएको छ। प्रहरीका अनुसार बरामद कुखुराको तौल करिब ५४ किलो छ।
नियन्त्रणमा लिइएका कुखुरा आवश्यक कारबाहीका लागि पशु क्वारेन्टाइन कार्यालय नेपालगन्ज पठाइएको जिल्ला प्रहरी कार्यालय बाँकेले जनाएको छ।
तर, प्रहरीले कुखुरा बरामद गरे पनि पचपोखरा क्षेत्रबाट हुने भनिएको अवैध ओसारपसार नरोकिएको स्थानीयको दाबी छ। उनीहरूका अनुसार पचपोखरा, साईगाउँ, बढैया क्षेत्रबाट विशेषगरी राति र बिहानको समयमा कुखुरा नेपाल भित्र्याउने गरिएको छ।
स्थानीय तथा प्रत्यक्षदर्शीले नाकामा खटिएका सशस्त्र प्रहरीको बीओपी र स्थानीय प्रहरी चौकीका सुरक्षाकर्मीको जानकारी वा मिलेमतोबिना नियमित रूपमा यस्तो ओसारपसार सम्भव नहुने आरोप लगाएका छन्।
‘नाकामा सुरक्षाकर्मी हुन्छन्, तर भारतबाट कुखुरा कसरी निरन्तर भित्रिन्छ ?’ एक स्थानीयले भने।
स्थानीयले सीमामा खटिएका सुरक्षाकर्मीको भूमिकामाथि छानबिन गर्न माग गरेका छन्। उनीहरूका अनुसार एक–दुई पटक कुखुरा बरामद गर्नु मात्रै पर्याप्त छैन। पचपोखरा, साईगाउँ, बढैया नाकाबाट भइरहेको भनिएको अवैध ओसारपसारको स्रोत, संलग्न व्यक्ति र सञ्जाल पहिचान गर्न अनुसन्धान आवश्यक छ।
Discussion about this post