काठमाडौें, भदौ १९ गते ।
सशस्त्र प्रहरी बल, नेपालले प्रधानमन्त्री दैवी प्रकोप उद्धार कोषमा संगठनका तर्फबाट १५ करोड ५० लाख रुपैयाँ योगदान गर्ने भएको छ। त्यसका लागि सशस्त्र प्रहरी कर्मचारीको तलबबाट निश्चित रकम कट्टा गरिने भएको छ।
बाढीमा परी मृत्यु भएका सशस्त्र प्रहरी कर्मचारीका आश्रित परिवारलाई तत्काल २५ लाख रुपैयाँ राहत उपलब्ध गराउने निर्णयसमेत गरिएको छ।
सशस्त्र प्रहरी महानिरीक्षक र अतिरिक्त महानिरीक्षकले १५ दिन, नायब महानिरीक्षक र वरिष्ठ उपरीक्षकले १२ दिन, उपरीक्षक, नायब उपरीक्षक र निरीक्षकले १० दिन तथा जुनियर अधिकृतले सात दिन बराबरको तलब योगदान गर्नेछन्। यस्तै, वरिष्ठ हवल्दारदेखि जवानसम्मले पाँच दिन र सशस्त्र प्रहरी परिचरले तीन दिन बराबरको तलब योगदान गर्नेछन्।
तर बिओपी टिमुरे र सुरक्षा बेस मैलुङमा कार्यरत रही बाढीमा परी ज्यान जोगाउन सफल भएका सशस्त्र प्रहरी कर्मचारीको तलबबाट भने रकम कट्टा नगरिने भएको छ।
बाढीमा परी मृत्यु भएका सशस्त्र प्रहरी कर्मचारीका आश्रित परिवारलाई राष्ट्रसेवकका तर्फबाट १५ लाख, राहतसम्बन्धी कार्यविधि, २०७९ अनुसार पाँच लाख र सशस्त्र प्रहरी बल, नेपाल विपद् प्रकोप राहत कोष सञ्चालनसम्बन्धी मापदण्ड, २०८१ अनुसार पाँच लाख गरी कुल २५ लाख रुपैयाँ तत्काल उपलब्ध गराइनेछ।
मृतक कर्मचारीले कल्याण कोषबाट लिएको ऋण तिर्न बाँकी सम्पूर्ण रकमसमेत मिनाहा गर्ने निर्णय भएको छ। मृतकका सन्ततिलाई पायक पर्ने नेपाल एपीएफ स्कुलमा कक्षा १० सम्म अध्ययनका लागि शैक्षिक शुल्क छुट दिइनेछ।
बाढीका कारण सशस्त्र प्रहरी कर्मचारीका आश्रित परिवारका सदस्यको मृत्यु भएमा प्रतिव्यक्ति एक लाख रुपैयाँ राहत दिइनेछ। बाढीमा ज्यान गुमाएका सशस्त्र प्रहरी कर्मचारीको स्मृतिमा उपयुक्त स्थानमा स्मारक निर्माण गर्ने निर्णयसमेत गरिएको छ।
मृतक कर्मचारीका आश्रित परिवारका एक–एक जना सदस्यलाई सीपमूलक तालिम दिइनेछ। बाढीमा परी ज्यान जोगाउन सफल पाँच जना सशस्त्र प्रहरी कर्मचारीलाई जनही ५० हजार रुपैयाँ राहत उपलब्ध गराइनेछ।
त्यस्तै, बाढी प्रभावित अवकाशप्राप्त सशस्त्र प्रहरी कर्मचारीको मृत्यु भएमा एक लाख, घरबारविहीन भएमा एक लाख तथा भौतिक संरचनामा आंशिक क्षति पुगेका र घाइतेलाई ५० हजार रुपैयाँसम्म तत्काल राहत उपलब्ध गराइनेछ।
सशस्त्र प्रहरी बल, नेपालका सहप्रवक्ता डिएसपी शैलेन्द्र थापाले संगठनले बाढी प्रभावित कर्मचारी तथा उनीहरूका परिवारलाई तत्काल राहत उपलब्ध गराउने निर्णय गरेको जानकारी दिए।
Discussion about this post