सिरहा, भदौ १९ गते ।
सिरहामा स्रोत नखुलेको १३ लाख ९२ हजार ४ सय रुपैयाँ नगदसहित एक जना पक्राउ परेका छन्।
जिल्ला प्रहरी कार्यालय सिरहाका अनुसार बिहीबार राति विशेष सूचनाका आधारमा सिरहा नगरपालिका–७ हेमनारायण चोकबाट रकमसहित सिरहा नगरपालिका–२ का ३५ वर्षीय शम्भु भनिने जितेन्द्र महासेठ पक्राउ परेका हुन्।
प्रहरीका अनुसार झोलामा राखेर रकम बोकेर हिँडिरहेका महासेठलाई चेकजाँच गर्दा रकमको स्रोत खुलाउन नसकेपछि नियन्त्रणमा लिइएको हो। प्रहरी प्रवक्ता रमेशबहादुर पालका अनुसार बरामद रकम हुण्डी कारोबारसँग सम्बन्धित रहेको आशंका गरिएको छ।
महासेठको साथबाट १ हजार दरका १ हजार ९२ थान, ५ सय दरका ५ सय ९९ थान तथा १ सय र ५० दरका ६–६ थान नोट बरामद भएको प्रहरीले जनाएको छ।
पक्राउ परेका महासेठलाई जिल्ला प्रहरी कार्यालय सिरहामा राखेर थप अनुसन्धान भइरहेको प्रहरीले जनाएको छ।
ADVERTISEMENT
Discussion about this post