काठमाडौें, भदौ २० गते ।
बाढी प्रभावित क्षेत्रमा राहत सामग्री पुर्याउन ड्रोन प्रयोगमा ल्याइएको छ। चीन सरकारले नेपाललाई खाद्यान्न तथा अन्य राहत सामग्री ढुवानीका लागि उपलब्ध गराएका चारवटा ड्रोन त्रिशूली क्षेत्रमा परीक्षणसहित प्रयोगमा ल्याइएको हो।
विज्ञान, प्रविधि तथा नवप्रवर्तनमन्त्री महावीर पुनका अनुसार ड्रोनले अधिकतम १०० किलोग्रामसम्म भार बोक्न सक्छ। उनका अनुसार एकपटकको उडानमा करिब ७५ देखि ८० किलोग्रामसम्म राहत सामग्री ढुवानी गर्न सकिनेछ।
परीक्षणपछि ड्रोनलाई रसुवालगायत बाढी प्रभावित क्षेत्रमा परिचालन गरिने मन्त्री पुनले बताए।
बाढीका कारण सडकमार्ग क्षतिग्रस्त भएका र हेलिकप्टरबाट समेत पुग्न कठिन स्थानमा राहत सामग्री पुर्याउन ड्रोन प्रभावकारी हुने अपेक्षा गरिएको छ। सडक तथा हवाई पहुँच अवरुद्ध भएका क्षेत्रमा ड्रोनमार्फत खाद्यान्न, औषधि तथा आवश्यक सामग्री पुर्याउन सकिने बताइएको छ।
Discussion about this post