बाँके, भदौ २३ गते ।
नेपालगन्जको जमुनाहा नाकाबाट गत आर्थिक वर्ष २०८२/८३ मा जोखिमपूर्ण यात्रामा रहेका ४ सय ६४ जना नेपाली नागरिकको उद्धार गरिएको छ ।
मानव बेचबिखनविरुद्ध क्रियाशील माइती नेपाल नेपालगन्जले उनीहरूको उद्धार गरी आवश्यक परामर्शपछि परिवारको जिम्मा लगाएको हो ।
माइती नेपाल नेपालगन्जका संयोजक केशव कोइरालाले आर्थिक प्रलोभन, घरायसी समस्या, चेतनाको कमी र सामाजिक सञ्जालको दुरुपयोगका कारण मानव बेचबिखनको जोखिम बढेको बताए ।
“नाकामा निगरानी बढाएर जोखिममा रहेका व्यक्तिको उद्धार गरिरहेका छौँ । तर हराएका आफन्तको खोजीका लागि आउने निवेदनको संख्या ठूलो छ,” उनले भने, “यसका लागि समुदायस्तरमा सचेतना र सरकारले रोजगारी तथा सुरक्षाका प्रभावकारी कार्यक्रम ल्याउनुपर्छ ।”
उनका अनुसार गत आर्थिक वर्षमा विभिन्न प्रलोभनमा भारत पुर्याइएका र श्रम तथा यौन शोषणमा परेका १० जनाको समेत उद्धार गरी स्वदेश फर्काइएको छ । भारतीय प्रहरी, नेपाली दूतावास र स्थानीय गैरसरकारी संस्थासँगको समन्वयमा उनीहरूको उद्धार गरिएको उनले बताए ।
हराएका आफन्तको खोजी तथा उद्धारका लागि गत वर्ष माइती नेपाल नेपालगन्जमा १ हजार १८ वटा निवेदन परेका थिए । तीमध्ये ५ सय ६८ जना फेला परेका छन् भने ४ सय ५० जनाको अवस्था अझै अज्ञात रहेको कोइरालाले बताए ।
मानव बेचबिखन तथा ओसारपसारमा संलग्नलाई कानुनी कारबाही र पीडितलाई न्याय दिलाउन संस्थाले कानुनी सहायता दिँदै आएको उनले बताए । गत वर्ष यस्ता तीनवटा मुद्दामा पीडित तथा प्रभावितलाई प्रत्यक्ष कानुनी सहायता दिइएको उनले जानकारी दिए ।
Discussion about this post